اسلام آباد: پاکستان تحریک انصاف (پی ٹی آئی) نے پارٹی چیئرمین کے خلاف سیشن کورٹ کے فیصلے کو اعلیٰ عدالت کے روبرو چیلنج کرنے کا اعلان کر دیا ہے۔
تفصیلات کے مطابق پی ٹی آئی نے اپنے چیئرمین کے خلاف سیشن عدالت کا فیصلہ مسترد کر دیا، پارٹی نے اس فیصلے کو اعلیٰ عدالت کے روبرو چیلنج کرنے کا اعلان کر دیا ہے۔
ترجمان پی ٹی آئی نے کہا کہ یہ فیصلہ لندن پلان کے تحت لیول پلیئنگ فیلڈ اہداف کے حصول کی ایک کوشش ہے، لیکن قائد کے خلاف سازش کی بھونڈی کوشش قوم ہرگز قبول نہیں کرے گی۔
توشہ خانہ کیس : چیئرمین پی ٹی آئی کو گرفتار کرلیا گیا
واضح رہے کہ اسلام آباد میں سیشن کورٹ نے توشہ خانہ کیس میں محفوظ فیصلہ سناتے ہوئے چیئرمین پی ٹی آئی کو 3 سال قید کی سزا سنا دی ہے اور ایک لاکھ جرمانہ عائد کر دیا، انھیں 5 سال کے لیے الیکشن ایکٹ کے تحت نا اہل بھی قرار دے دیا گیا ہے۔
عدالت نے توشہ خانہ کیس میں چیئرمین پی ٹی آئی کے وارنٹ گرفتاری بھی جاری کیے جس پر انھیں لاہور میں زمان پارک سے گرفتار کر کے کوٹ لکھپت جیل منتقل کر دیا گیا ہے۔
