لاہور : پنجاب حکومت نے 9مئی کےواقعات میں ملوث ملزمان کا جیل کے اندر ٹرائل کرنے کا فیصلہ کرلیا ، انسداد دہشت گردی ایکٹ کے تحت مقدمات کی سماعت روزانہ ہو گی۔
تفصیلات کے مطابق نگران وزیراعلیٰ پنجاب محسن نقوی کی زیرصدارت اجلاس ہوا ، چیف سیکرٹری، آئی جی، سی سی پی او، سیکرٹری پراسیکیوشن،کمشنر لاہور ویگرحکام کنے شرکت کی۔
اجلاس میں 9 مئی کے واقعات میں ملوث شرپسندوں کیخلاف کارروائیوں پر پیشرفت کا جائزہ لیا گیا، جس کے بعد 9 مئی کے واقعات میں ملوث ملزمان کا جیل کے اندر ٹرائل کا فیصلہ کیا گیا۔
ملزمان کے خلاف انسداد دہشت گردی ایکٹ کے تحت مقدمات کی سماعت روزانہ ہوگی اور جیل کے اندر ٹرائل کے حوالے سے متعلقہ اداروں کو باقاعدہ آگاہ کیا جائے گا۔
اجلاس میں 9 مئی کے واقعات میں ملوث شرپسندوں کیخلاف کارروائیوں کوتیز کرنے پر بھی اتفاق کیا گیا، محسن نقوی نے پولیس اور پراسیکیوشن کو ملزمان کیخلاف مضبوط شہادتیں پیش کرنے کی ہدایت کرتے ہوئے کہا کہ کسی بھی شرپسند کو معاف نہیں کیا جائے گا،کسی بے گناہ کو سزا نہیں ہونے دی جائے گی۔
اجلاس میں مفرورشرپسندوں کو قانون کے کٹہرے میں لانے کیلئے کارروائیاں تیز کرنے کا حکم بھی دیا گیا ، بریفنگ میں بتایا گیا کہ تفتیش کےدوران بے گناہ ثابت ہو نے پر 200 افراد کو بری کر دیا گیا ہے، شرپسندو ں کے خلاف مقدمات مضبوط شہادتوں کے ساتھ پیش کئے جا رہے ہیں۔
چیف سیکرٹری، آئی جی، سی سی پی او، سیکرٹری پراسیکیوشن،کمشنر لاہور ویگرحکام کی شرکت
