کراچی : شہر قائد میں مون سون کے تیسرے اسپیل کے آثار نظر آنے لگے ، مختلف علاقوں میں تیز بارش ہوئی ، محکمہ موسمیات کا کہنا ہے کہ موجودہ سسٹم چند ہفتے قبل بارش برسانے والے سسٹم سے کمزور ہے۔
تفصیلات کے مطابق محکمہ موسمیات کا کہنا ہے کہ شہرمیں بارش برسانے والے بادل داخل ہوگئے ہیں ، آج شام یارات میں گرج چمک کےساتھ بارش کاامکان ہے، شہر اور مضافات میں درمیانے درجے کی بارش متوقع ہے، موجودہ سسٹم چند ہفتے قبل بارش برسانے والے سسٹم سے کمزور ہے۔
محکمہ موسمیات کے مطابق بارش کا نظام آج رات سےجمعے کی صبح تک وقفے وقفے سےبرسے گا ، کراچی میں 15 سے 20 ملی میٹر تک بارش کی پیشگوئی ہیں۔
مون سون سسٹم داخل ہوتے ہی کراچی کے مختلف علاقوں میں تیز بارش اور بوندا باندی کا سلسلہ جاری ہے، جن میں ایف بی ایریا،گلشن معمار،گلستان جوہر، تیسر ٹاؤن ، نارتھ کراچی، ناگن چورنگی، نیو کراچی، سرجانی نارتھ ناظم آباد شامل ہیں۔
دوسری جانب حیدرآباد، ٹھٹھہ ،میرپورخاص اور دیگر اضلاع میں گرج چمک کے ساتھ بادل برسیں گے، ڈی جی ہیلتھ سندھ نے اسپتالوں کے عملے کی چھٹیاں منسوخ کر دیں ہیں۔
محمکہ موسمیات کا کہنا ہے کہ آج ملک کے دیگرعلاقوں میں موسم گرم اورمرطوب رہے گا، مالاکنڈ، ہزارہ، بہاولپور، ملتان، ڈی جی خان، قلات ڈویژن، کشمیر اور گلگت بلتستان میں چند مقامات پرتیزہواؤں اورگرج چمک کیساتھ بارش کی توقع ہے۔
