کراچی : رمضان المبارک کا مقدس ماہ شروع ہوتے ہی کمائی کی غرض سے ہزاروں گداگرکراچی پہنچ گئے اور شہر کی شاہراہوں ،چوراہوں ،شاپنگ سینٹرز پر یلغار کردی۔
تفصیلات کے مطابق رمضان شروع ہوتے ہی گداگروں نے کراچی کا رخ کرلیا۔ شہر بھر کے شاپنگ سینٹرز ،چوراہوں ،مساجد ،سگنلز، ہوٹل ریسٹورنٹس پر گداگروں نے اپنے ڈیرے جما لیے، گداگر شہریوں کا پیچھا نہیں چھوڑتے۔
عید کی شاپنگ کرنا عذاب کردی، ملک بھرسے گداگروں رمضان شروع ہوتے ہی کمائی کے لئے کراچی پہنچ جاتے ہیں اور کراچی والوں کا جینا دوبھر کردیتے ہیں، جہاں سے گزریں ایک ہی صدا آتی ہے کچھ دے جا بابا۔ ایک کو خیرات دے دی جائے تو دو تین اور مانگنے کے لئے کھڑے ہوجاتے ہیں۔
ملک بھر کے گاﺅں اور دیہات سے لائے گئے ان گداگروں میں بوڑھے جوان ،بچے اور خواتین کے علاوہ بڑی تعداد جسمانی معذوروں کی بھی ہوتی ہے، کراچی میں گدا گری کا کاروبار مافیا کی صورت اختیار کر گیا ہے اور تقریباً ڈیڑھ لاکھ سے زائد گدا گر رمضان المبارک کے سیزن میں کراچی آتے ہیں۔
یاد رہے کہ ماہ رمضان سے قبل ایڈیشنل آئی جی کراچی مشتاق مہر نے پولیس کو الرٹ جاری کرتے ہوئے رمضان میں گداگری، بھتہ خوری،لوٹ مار اورٹریفک کی روانی برقرار رکھنے کے لیے پولیس کوحکمت عملی تیار کرنے کی ہدایت کی تھی ۔
ایڈیشنل آئی جی کراچی نے گداگروں کے خلاف بھی خصوصی طور پرسخت ایکشن کی ہدایت کی تھی جس میں کہا گیا تھا کہ گداگروں کی گرفتاری کا عمل پورے ماہ جاری رکھا جائے۔
ان ہدایات کے با وجود تا حال کراچی پولیس کی جانب سے شہریوں کی جان ان پیشہ ور گداگروں سے چھڑانے کیلئے کوئی خاطرخواہ اقدامات نظر نہیں آرہے۔
