اسلام آباد: وزیر داخلہ رانا ثنا اللہ کے وارنٹ گرفتاری پر تعمیل نہیں ہو سکی۔
تفصیلات کے مطابق وزیر داخلہ رانا ثنااللہ کے خلاف دھوکا دہی کے مقدمے میں اینٹی کرپشن ٹیم رانا ثنا کو گرفتار نہ کر سکی۔
رپورٹ کے مطابق اینٹی کرپشن کی ٹیم وزیر داخلہ کی گرفتاری کے لیے تھانہ سیکریٹریٹ آئی اور ایس ایچ او سے ملاقات کی، عدالتی حکم نامہ اور وارنٹ گرفتاری بھی ایس ایچ او کے حوالے کیے گئے۔
تاہم وارنٹ گرفتاری پر تعمیل نہ ہونے کے سبب اینٹی کرپشن ٹیم واپس روانہ ہو گئی، اینٹی کرپشن ٹیم کی آمد کی انٹری بھی رجسٹر میں نہیں کی گئی۔
عدالت کا وفاقی وزیرداخلہ رانا ثنااللہ کو گرفتار کرکے پیش کرنے کا حکم
اینٹی کرپشن ٹیم کا کہنا تھا کہ ہم عدالتی حکم پر آئے تھے، لیکن ہماری گاڑیاں بھی تھانے سے نکلوا دی گئیں، دوسری طرف ایس ایچ او تھانہ سیکریٹریٹ نے مؤقف پیش کیا کہ وارنٹ کے حوالے سے فائل لے لی گئی ہے، اس سلسلے میں بعد میں آگاہ کیا جائے گا۔
