ممبئی : معروف اداکار رنویر سنگھ اپنی نئی فلم میں سابق بھارتی فاسٹ باؤلر اور 1983 میں ورلڈ کپ جیتنے والی انڈین ٹیم کے کپتان کپل دیو کا کردار نبھائیں گے۔
رنویر سنگھ اپنے فلمی کیریئر کا سب سے منفرد اور جیتا جاگتا یہ کردار کبیر خان کی زیر ہدایت بننے والی فلم ’’83‘‘ میں ادا کریں گے جس کے لیے وہ نہایت پُر امید اور پُر عزم ہیں۔
چوں کہ اس فلم کی کہانی 1983 میں بھارتی کرکٹ ٹیم کے ورلڈ کپ جیتنے کے گرد گھومتی ہے جس کا مرکزی کردار ممتاز فاسٹ باؤلر اور اس وقت کے انڈین کپتان کپل دیو ہیں جسے ممتاز اداکار رنویر سنگھ نبھائیں گے۔
کبیر خان جو بجرنگی بھائی جان جیسی کامیاب فلم دے چکے ہیں اب رنویر سنگھ کو کپل دیو کے کردار میں ورلڈ کپ 1983 کے سنسنی خیز میچوں اور بھارت کی پہلی مرتبہ ورلڈ کپ جیتنے کے پُر جوش اور جذباتی مناظر کو فلم بند کرنے کے لیے کمر کس چکے ہیں۔
کبیر خان نے 1983 ورلڈ کپ کی یادوں کو اپنی بچپن کے یادگار لمحات قرار دیتے ہوئے کہا کہ جب وہ اسکول میں پڑھا کرتے تھے تو واپسی پر بڑے شوق سے میچ دکھا کرتے تھے تاہم وہ اس وقت سوچ بھی نہیں سکتے تھے کہ یہ ورلڈ کپ بھارت میں کرکٹ کو دیوانگی حد تک مقبول بنادے گا اور اس فتح کے بعد کرکٹ ایک ایک بھارتی کی رگوں میں رچ بس جائے گی۔
کبیر خان کا کہنا تھا کہ بہ طور فلم میکر میرے لیے سب سے اہم موضوع نوجوان بھارتی کرکٹ ٹیم کا وہ عزم و حوصلہ ہے جسے لندن کے گراؤنڈز میں پہلے میچ سے فائنل کی فتح تک جواں ہوتے دیکھا جو بہت پُر تاثیر، حوصلہ مند اور قابل فخر ہے جنہیں فلمانا یقیناً میرے لیے فخر کا باعث ہوگا۔
.@RelianceEnt & @FuhSePhantom in association with Vibri Media & Kabir Khan Films to release ‘83 on 5th April 2019! https://t.co/mSjC3D0tHZ
— Reliance Entertainment (@RelianceEnt) November 5, 2017
کبیر خان نے رنویر سنگھ کو کپل دیو کے کردار کے لیے موزوں قرار دیتے ہوئے بتایا کہ میں نے رنویر کو اسکرپٹ مکمل کرنے سے پہلے ہی اس کردار کے لیے منتخب کرلیا تھا اور ایسا میری فلمی کیریئر میں بہت کم ہوا ہے اور خود رنویر بھی اس فلم کے نہایت پُر جوش دکھائی دیتے ہیں۔
بھارت کے پہلی مرتبہ ورلڈ کپ میں فتح یاب ہونے کے فلمی مناظر کو مختلف کرداروں کی مدد سے شائقین پردہ اسکرین پر 5 اپریل 2019 کو دیکھ سکیں گے جس کے لیے بھارتی فلموں کے شوقین افراد کے علاوہ کرکٹ سے لگاؤ رکھنے والے بھی بے چین دکھائی دیتے ہیں۔
اگر آپ کو یہ خبر پسند نہیں آئی تو برائے مہربانی نیچے کمنٹس میں اپنی رائے کا اظہار کریں اور اگر آپ کو یہ مضمون پسند آیا ہے تو اسے اپنی فیس بک وال پر شیئر کریں۔