لاہور: معروف پاکستانی اداکارہ ریما خان نے کرونا وائرس سے بچاؤ کی ویکسین لگوا لی، وہ پہلی پاکستانی اداکارہ ہیں جنھوں نے کو وِڈ کے خلاف ویکسی نیشن کروائی۔
تفصیلات کے مطابق اداکارہ ریما خان نے انسٹاگرام پر ایک پوسٹ میں اپنے فالوورز کو خبر دی کہ انھوں نے کرونا وائرس کی ویکسین لگوا لی ہے۔
ریما خان نے ایک ویڈیو شیئر کی جس میں وہ کہتی نظر آتی ہیں کہ میں آج کو وِڈ نائنٹین کی پہلی ویکسین لگوا رہی ہوں، اور میں ٹھیک محسوس کر رہی ہوں۔
امریکا کے ایک ویکسین سینٹر میں کرونا ویکسین لگواتے ہوئے ریما خان نے انجیکشن لگنے کے وقت ہلکی سی چیخ بھی ماری، تاہم وہ اس سے بالکل بھی نہیں گھبرائیں۔
View this post on Instagram
ریما کی پوسٹ پر اداکار عمران عباس نے تبصرہ لکھا کہ آپ کئی معاملات میں آگے رہتی اور ابتدا کرنے والوں میں سے ہوتی ہیں، محفوظ رہیں، صحت مند اور خوبصورت رہیں۔
واضح رہے کہ اداکارہ ریما خان امریکا میں اپنے شوہر اور بیٹے کے ساتھ مقیم ہیں۔وہ 2011 میں پاکستانی نژاد امریکی ڈاکٹر طارق شہاب سے شادی کر کے امریکا منتقل ہوگئی تھیں۔ ریما خان کو شان دار اداکاری پر مارچ 2019 میں حکومت پاکستان نے تمغاے حسن کارکردگی سے نوازا تھا۔
View this post on Instagram
ویکسین سے قبل انھوں نے ایک ویڈیو اپ لوڈ کی تھی جس میں انھوں نے بتایا کہ میں کو وِڈ 19 کی ویکسین لگوانے جا رہی ہوں، یہ بہت اہم ہے میری دعا ہے کہ ویکسین جلد از جلد پاکستان بھی آئے۔
ریما نے کہا میری درخواست ہے کہ تمام لوگ ویکسین ضرور لگوائیں، نہ صرف اپنے لیے بلکہ اپنے پیاروں کے لیے بھی۔
