کراچی: شہر قائد کے علاقے سولجر بازار میں ریٹائرڈ پولیس اہلکار سلیم انصاری کے جھلس کر جاں بحق ہونے کے واقعے میں پولیس نے سرکار کی مدعیت میں تھانہ سولجر بازار میں بیٹوں کے خلاف مقدمہ درج کر لیا۔
پولیس حکام کا کہنا ہے کہ سولجر بازار میں ریٹائرڈ پولیس اہلکار کو مار کر جلانے والے بیٹے نکلے، قتل میں ملوث ریٹائرڈ اہلکار کے ایک بیٹے سلمان کو گرفتار کر لیا گیا ہے، سلمان نے پولیس کے سامنے باپ کے قتل کا اعتراف کر لیا ہے۔
پولیس حکام کا کہنا ہے کہ ریٹائرڈ اہلکار کا ایک بیٹا عمران فرار ہو گیا ہے، عمران محکمہ پولیس کا حاضر سروس اہلکار ہے۔ سلیم انصاری کے بیٹے پوسٹ مارٹم کرانے سے منع کر رہے تھے، جس پر شک کی بنیاد پر پوسٹ مارٹم کرایا گیا تو رپورٹ میں قتل کا انکشاف ہوا۔
سولجر بازار میں ریٹائرڈ پولیس اہلکار کی جھلسنے سے موت مشکوک نکلی
پوسٹ مارٹم رپورٹ کے مطابق ریٹائرڈ اہلکار کو گلا گھونٹ کر قتل کیا گیا، قتل کے بعد واقعے کو حادثے کا رنگ دینے کے لیے لاش جلائی گئی، بیٹوں نے جائیداد کے تنازع پر والد کو قتل کیا۔ یہ بھی معلوم ہوا کہ مقتول کی اپنی بیوی سے علیحدگی ہو گئی تھی، جس کے بعد ایک بیٹا والدہ اور دوسرا والد کے گھر میں رہتا تھا۔
