لاہور: سال نو کی آمد کے موقع پر جہاں ہر شخص گزرے سال پر اپنی کامیابیوں پر خوش ہے وہی پنجاب سے تعلق رکھنے والی 12 سالہ طلبہ سمیعہ معراج نے رواں سال کے اختتام پر آپریشن ضرب عضب میں شہید ہونے والے فوجی جوانوں کو منفرد انداز میں خراج تحسین پیش کیا۔
موسیقی کی دنیا میں قدم رکھنے والی 12 سالہ سمیعہ معراج کلاس 9 کی طالب علم ہیں اور وہ پنجاب یونیورسٹی آف میوزک سے موسیقی کی باقاعدہ تربیت حاصل کررہی ہیں۔
سمیعہ کے والد نے آر وائی نیوز سے گفتگو کرتے ہوئے بتایا کہ ’’اُن کا تعلق مڈل کلاس گھرانے سے ہے اور وہ رکشہ ڈرائیور ہیں، سمیعہ کو بچپن سے موسیقی کا شوق تھا، اس لیے ہم نے اُس کی باقاعدہ تربیت کے لیے استاد کا بندوبست کیا‘‘۔
انہوں نے بتایا کہ ’’سمیعہ نے موسیقی کی دنیا میں کچھ ماہ قبل قدم رکھا تاہم اس دوران انہوں نے اپنے صلاحیتوں کا لوہا منواتے ہوئے الحمرا ہال میں ہونے والے 58ویں کل پاکستان موسیقی کا ایوارڈ حاصل کیا‘‘۔
سمیعہ معراج نے سال 2016 کو آپریشن ضرب عضب میں شہید ہونے والے فوجیوں کے نام کرتے ہوئے اُن کے لیے اپنی مدھر آواز میں ملی نغمہ ’’اے راہ حق کے شہیدوں‘‘ گایا جس میں اُن کا فن اور تربیت واضح طور پر سنائی دے رہی ہے۔
علاوہ ازیں سمیعہ نے معروف پاکستانی گلوکار سجاد علی کا مشہور گانا ’’ہرظلم تیرا یاد ہے‘‘ اور راحت فتح علی خان کی آواز میں گایا ہوا بالی ووڈ گانا ’’جگ گھومیا‘‘ بھی اپنی مخصوص آواز میں گایا ہے۔
