لاہور : عسکری ٹاور حملہ کیس سے ڈسچارج ہونے والی پی ٹی آئی کارکن صنم جاوید کو عدالت کے احاطے سے نئے مقدمہ میں دوبارہ گرفتار کرلیا گیا۔
تفصیلات کے مطابق پولیس نے پی ٹی آئی کارکن صنم جاوید کو عدالت کے احاطے سے نئے مقدمہ میں دوبارہ گرفتارکرلیا۔
پولیس نے بتایا کہ صنم جاوید کو مسلم لیگ ن کا آفس جلانے کے مقدمہ میں گرفتار کیا گیا ہے۔
اس سے قبل انسداد دہشت گردی کی عدالت میں پی ٹی آئی کارکن صنم جاوید کی رہائی کے بعد دوبارہ گرفتاری کے کیس کی سماعت ہوئی تھی۔
پولیس نے عسکری ٹاور حملہ کیس میں صنم جاوید کو انسداد دہشت گردی عدالت میں پیش کیا اور صنم جاوید کی عسکری ٹاور حملہ کیس میں شناخت پریڈ کی اجازت مانگی۔
عدالت نے صنم جاوید کی نئے مقدمہ میں شناخت پریڈ کی استدعا مسترد کرتے ہوئے صنم جاوید کو عسکری ٹاور حملہ کیس سے ڈسچارج کر دیا تھا۔
عدالت کا کہنا تھا کہ لاہور ہائی کورٹ میں سی سی پی او نے رپورٹ دی ملزمہ کیخلاف 2 کے علاوہ کوئی کیس نہیں، سی سی پی او رپورٹ کی بنیاد پرملزمہ کی نئے مقدمہ میں گرفتاری غیر قانونی ہے۔
