اسلام آباد : سارہ انعام قتل کیس میں مقتولہ کے والد انعام الرحیم نے مجرم کی والدہ ثمینہ شاہ کو بری کرنے کے فیصلے کے خلاف اپیل دائر کردی۔
تفصیلات کے مطابق سارہ انعام قتل کیس میں مقتولہ کے والد انعام الرحیم نے اسلام آباد ہائیکورٹ سے رجوع کرلیا۔
والد انعام الرحیم نے مجرم کی والدہ ثمینہ شاہ کو بری کرنے کے فیصلے کے خلاف اپیل دائر کردی۔
مقتولہ کے والد نے وکیل راؤ عبد الرحیم کے ذریعے ہائیکورٹ میں اپیل دائر کی، درخواست میں کہا گیا ہے کہ سیشن عدالت نے ثمینہ شاہ کو کیس سے بری کیا، سیشن عدالت کا ثمینہ شاہ کو کیس سے بری کرنے کا فیصلہ قلعدم قرار دیاجائے۔
درخواست میں استدعا کی گئی ہے ثمینہ شاہ کو زیادہ سے زیادہ سزا سنائی جائے۔
یاد رہے عدالت نے سارہ انعام قتل کیس میں مرکزی ملزم شاہنواز امیر کو سزائےموت کا حکم دیا تھا اور ملزمہ ثمینہ شاہ کو عدم ثبوت کی بنا پر بری کردیا تھا۔
بعد ازاں اسلام آباد ڈسٹرکٹ کمپلیکس کے باہر سارہ انعام کے والد انعام الرحیم نے میڈیا سے گفتگو کرتے ہوئے عدالت کے فیصلے کو درست قرار دیا اور کہا شاہنواز امیر کو جب تک پھانسی پر لٹکایا نہیں جاتا،پیچھے نہیں ہٹیں گے۔
انعام الرحیم کا کہنا تھا کہ جس وقت سارہ انعام کا قتل ہوا اس وقت اس گھر میں تین لوگ موجود تھے، ایک سارہ انعام، شاہنواز امیر اور شاہنواز امیر کی والدہ ثمینہ شاہ موجود تھے، یہ جھوٹ ہے کہ شاہنواز امیر کی والدہ کو کچھ پتہ نا ہو کیونکہ رات کو آواز دور دور تک جاتی ہے ، میری عدالت سے گزارش ہے شاہنواز کی والدہ کو بھی قتل چھپانے کے جرم میں سزا ہونی چاہئیے۔
