ریاض: ‘السعودیہ’ اور ‘گلف ایئر’ کے درمیان مشترکہ معاہدہ طے پاگیا جس کے تحت مقامی اور بین الاقوامی پروازوں کے مسافروں کو سہولیات فراہم کی جائیں گی۔
غیرملکی خبررساں ادارے کی رپورٹ کے مطابق گلف ایئر اور السعودیہ نے مسافروں کو سفر کے متعدد آپشن فراہم کرنے کے لیے مشترکہ علامات کا معاہد طے کیا ہے، دونوں ایئرلائنز مارکیٹنگ اور ٹکٹ بھی فروخت کریں گی، اس اقدام کی بدولت السعودیہ اور گلف ایئر کے درمیان اسٹراٹیجک شراکت مضبوط ہوگی۔
معاہدہ کے تحت السعودیہ اور گلف ایئر مختلف نمبروں کے ساتھ پروازوں کی مارکیٹنگ اور ٹکٹیں فروخت کریں گی، مشترکہ علامت کے ذریعے علاقے کے ممالک اور بیرونی دنیا کے لیے پروازوں کا دائرہ بھی وسیع کیا جائے گا۔
دونوں ایئرلائنز کے درمیان اتفاق ہوا ہے کہ اپنے مسافروں کو معیاری ضیافت کا بندوبست کریں گی اور سعودی عرب میں زیادہ سے زیادہ ہوائی اڈوں کے لیے آپشن دیں گی، جبکہ بین الاقوامی پروازوں کے مسافرں کے لیے بھی کئی آپشنز کی فراہمی پلان کا حصہ ہے۔ اس معاہدے سے ایئرلائنز کے درمیان اسٹراٹیجک شراکت مزید بڑھے گی۔
سعودی عرب: فضائی مسافروں کیلئے سفری ہدایات جاری!
سعودی ایئرلائن السعودیہ کے ایگزیکٹیو چیئرمین کیپٹن ابراہیم الکشی کا کہنا ہے کہ اس اہم اقدام سے دونوں فضائی کمپنیوں کے مسافروں کو فائدہ ہوگا، وہ مختلف اسٹیشنوں سے سفری سہولیات حاصل کرسکیں گے۔
ادھر گلف ایئر کے ایگزیکٹیو قائم مقام چیئرمین کیپٹن ولید العلوی نے بتایا کہ السعودیہ اور گلف ایئر 7 عشروں سے زیادہ عرصے سے مسافروں کی خدمت کررہی ہیں، مشترکہ تعاون سے مسافر فائدہ اٹھائیں گے۔