سعودی عرب نے خروج و عودہ (ایگزٹ ری انٹری ویزے) پر سفر کرنے والے ان کارکنان کی تین سال سے قبل واپسی پر عائد پابندی ختم کردی ہے جو ویزے کی میعاد ختم ہونے پر مملکت واپس نہ لوٹ سکے ہوں۔
بین الاقوامی خبر رساں ادارے کی رپورٹ کے مطابق محکمہ پاسپورٹ نے بتایا ’ائیر پورٹس، بندرگاہوں اور بری سرحدی چیک پوسٹوں کے حکام کو تحریری طور پر اس کی اطلاع کردی گئی ہے۔
منگل 16 جنوری سے پابندی اٹھانے کے فیصلے پر عمل درآمد شروع ہوگیا ہے، اس کی اطلاع فضائی کمپنیوں، بحری جہازوں اور بری سرحدی چیک ٹرانسپورٹ کے ذمہ داران کو بھی دیدی گئی ہے۔
سعودی محکمہ پاسپورٹ کی جانب سے آفیشل ایکس اکاونٹ پر خروج و عودہ ویزے (ایگزٹ ری انٹری) پر مملکت سے سفر کرکے واپس نہ آسکنے والے تارکین کے اہم سوالات کے جواب دیے ہیں۔
ایک غیر ملکی نے استفسار کیا کہ میرا ویزا ختم ہوگیا۔ کیا ملازمت کے نئے ویزے پر سعودی عرب واپس آسکتا ہوں یا مجھے تین سال گزارنا ضروری ہوں گے؟۔
اس کے جواب میں محکمہ پاسپورٹ کا کہنا تھا کہ ’جو شخص سعودی عرب سے ایگزٹ ری انٹری ویزے پر جا کر واپس نہ آئے تو وہ ملازمت کے نئے ویزے پر واپس آسکتا ہے۔‘
ایک اور شخص سوال کیا کہ ’ایگزٹ ری انٹری ویزے پر سعودی عرب سے سفرکیا تاہم ویزا ختم ہوگیا۔ اب نئے آجر کے ویزے پر واپس آسکتا ہوں یا پرانے آجر کے ویزے پر آنے کی اجازت دی جائے گی؟۔‘
عمانی عمرہ زائرین کو خوشخبری سنادی گئی
اس پر محکمہ پاسپورٹ کا جواب دیتے ہوئے کہنا تھا کہ ’ملازمت کے نئے ویزے پر واپسی ممکن ہے۔ پرانے آجر کا ویزا ضروری نہیں۔ نئے آجر کے ویزے پر بھی آسکتے ہیں اور پرانے آجر کے نئے ویزے پر بھی واپسی کی اجازت ہے۔‘
