سعودی عرب میں 93 ویں یوم الوطنی کا جشن بھرپور جوش و جذبے کے ساتھ منانے کی تیاریاں اپنے عروج پر پہنچ گئیں۔
بین الاقوامی خبر رساں ادارے کی رپورٹ کے مطابق مملکت میں سرکاری اور ملک کی اہم عمارتوں پر سبز رنگ کی لائٹیں لگا دی گئیں۔ سعودی عرب کے تمام بڑے شہروں اورقصبوں کی سڑکوں پر قومی پرچموں کی بہار آگئی ہے۔
اطلاعات کے مطابق سعودی عرب میں یوم الوطنی 93 کا سب سے بڑا جشن دارالحکومت ریاض میں منایا جائے گا جہاں محکمہ تفریحات کی جانب سے متعدد پروگرام منعقد کئے جائیں گے۔
محکمہ تفریحات کا اس حوالے سے جاری کردہ بیان میں کہنا ہے کہ ریاض، طائف، باحہ، عسیر اور تبوک میں 23 ستمبر کو خاص پروگرام ہوگا جسے ’خوابوں سے آگے‘ کا نام دیا گیا ہے، سول اور عسکری طیاروں کی جانب سے 23 ستمبر کو سعودی پرچم کا شو پیش کیا جائے گا۔
یوم وطنی کے جشن میں سرکاری اور نجی ادارے جن میں ریاستی سلامتی کا اعلی ادارہ، محکمہ شہری ہوابازی، وزارت دفاع، وزارت داخلہ، وزارت نیشنل گارڈز، مطارات کمپنی، سعودی فضائی خدمات کمپنی، سعودی ایئر کلب، سعودی عریبین ایئرلائنز (السعودیہ) شریک ہوں گے۔
السعودیہ چینل کے ذریعے یوم الوطنی کے سب سے بڑے شو کے مناظر براہ راست نشر کئے جائیں گے، فوجی پریڈ بھی شوکا حصہ ہوگا جس میں عسکری گاڑیاں بھی شامل ہوں گی۔ علاوہ ازیں شاہی محافظوں کا دستے اور عسکری بینڈ بھی اس کا حصہ ہوں گی، گھڑ سوار دستے آگے چلیں گے۔
یوم وطنی پر سعودیہ کے بڑے شہروں میں اہم مقامات پر آتش بازی کا مظاہرہ بھی کیا جائے گا، جبکہ جشن کی تقریبات 21 سے 24 ستمبر تک ریاض فرنٹ زون میں منعقد کی جائیں گے۔
