ریاض : سیرو تفریح کیلئے جانے والے سعودی خاندان ایک حادثے کا شکار ہوا جس میں سوار ایک لڑکی نے اپنے بھائی بہنوں کو بچانے کیلیے اپنی جان کی بھی پرواہ نہیں کی۔
اس حوالے سعودی ذرائع ابلاغ کی رپورٹ کے مطابق عسیر ریجن میں بھائی اور بہنوں کو بچانے کے لیے جان کی بازی ہارنے والی سعودی لڑکی ریما مناع کے والد کا کہنا ہے کہ میری بیٹی نے پورے معاشرے کو ایثار اور قربانی کا سبق دیا ہے۔
ریما کے والد مناع بن راشد نے مقامی اخبار سے گفتگو کرتے ہوئے کہا کہ میری بیٹی گاڑی سے اتر کر اپنی جان بچا سکتی تھی لیکن اس نے اپنی جان پر اپنے بھائی اور بہنوں کی جان کو ترجیح دی۔
انہوں نے بتایا کہ پورا خاندان موسم گرما کی تعطیلات گزارنے رجال المع پہنچا ہوا تھا۔ اسی دوران گاڑی ایک ڈھلان والے راستے پر خراب ہوگئی اور پیچھے کی جانب چل پڑی۔
21سالہ ریما نے فورا گاڑی کا دروازہ کھولا اور اپنی بہنوں کو باہر نکلنے میں مدد کی، اس کے بعد ریما جو کہ خود باہر نکل سکتی تھی مگر اپنے بھائی احمد کو بچانے کی کوشش کرتی رہی۔
اچانک کار قلابازیاں کھانے لگی اور تین سے زیادہ بار الٹنے کے بعد بھائی احمد گاڑی سے باہر گر گیا جس کے سر پر چوٹ آئی۔ آن ہی آن میں گاڑی نیچے کھائی میں جا گری اور اس میں موجود ریما سر پر چوٹ لگنے سے جاں بحق ہوگئيں۔
ریما کے والد کا کہنا ہے کہ میری بیٹی ریما موجودہ دور کی لڑکیوں سے الگ تھی، وہ ہماری ہیرو ہے، میری بیٹی گاڑی کے دروازے کے قریب بیٹھی تھی خود کو آسانی سے بچاسکتی تھی۔
العربیہ کے مطابق ریما مناع کو موسم گرما کی تعطیلات کے بعد ریاض کے کنگ خالد انٹرنیشنل ایئرپورٹ پر اپنی نئی ملازمت کی شروعات کرنا تھی۔
