کراچی: شہر قائد کے اسپتال قومی ادارہ برائے امراض قلب میں بچے کا کامیاب آپریشن کرکے سینے میں گھسا پیچ کس نکال لیا گیا۔
تفصیلات کے مطابق کراچی میں قومی ادارہ برائے امراض قلب کے ڈاکٹرز نے کامیاب آپریشن کرکے بچے کے سینے میں گھسا پیچ کس نکال لیا، دیگر اسپتالوں نے بچے کا آپریشن کرنے سے انکار کردیا تھا۔
نمائندہ اے آر وائی نیوز انور خان کے مطابق کراچی میں ارسلان نامی بچے کے سینے میں کھیل کے دوران پیچ کس گھس گیا تھا، قومی ادارہ برائے امراض قلب کے ڈاکٹروں نے پیچیدہ آپریشن کے ذریعے بچے کی زندگی بچالی۔
رپورٹ کے مطابق سینے میں پیچ کس گھسنے کے بعد بچے کو فوری طور پر مختلف اسپتالوں میں لے جایا گیا تاہم وہاں بچے کا آپریشن کرنے سے انکار کردیا گیا کیونکہ سینے میں جس جگہ اسکریو ڈرائیور لگا تھا وہاں دماغ اور دل کی وینز ہوتی ہیں۔
بعدازاں قومی ادارہ برائے امراض قلب لے جایا گیا جہاں کامیاب آپریشن کے بعد پیچ کس نکال لیا گیا۔
ارسلان کے والدین کا کہنا ہے کہ بچہ ماموں کے گھر رہتا ہے جہاں کھیل کے دوران اسکریو ڈرائیور سینے میں پیوست ہوگیا تھا۔
اسپتال انتظامیہ کا کہنا ہے کہ آپریشن میں تاخیر سے بچے کی زندگی کو خطرہ لاحق ہوسکتا تھا تاہم بچے کی حالت اب خطرے سے باہر ہے اسے جلد ڈسچارج کردیا گیا جائے گا۔
