کراچی: سندھ میں موجودہ صورتحال کے پیش نظر دفعہ 144 نافذ کردی گئی ہے جس کا نوٹیفکیشن بھی جاری کردیا گیا ہے۔
اے آر وائی نیوز کے مطابق سندھ میں دفعہ 144 کا نفاذ پرتشدد احتجاج کی روک تھام کے لیے کیا گیا ہے، مظاہروں، احتجاج اور ریلیوں میں 4 سے زائد افراد کے جمع ہونے پر پابندی ہوگی۔
نوٹیفکیشن میں کہا گیا ہے کہ دفعہ 144 کی خلاف ورزی پر قانونی کارروائی کی جائے گی۔
دوسری جانب عمران خان کی گرفتاری پر شہر کی امن و امان کی صورتحال کے پیش نظر آئی جی سندھ نے کراچی کے تین ڈی آئی جیز کو اضافی نفری دے دی ہے۔
مراسلے کے مطابق سعید آباد، رزاق آباد ٹریننگ سینٹر سے 1500 سے زائد اضافی نفری طلب کی گئی ہے۔
مراسلے میں کہا گیا ہے کہ نفری ساؤتھ اور ویسٹ زون میں تعینات کی جائے گی، ہر زونل ڈی آٗئی جی کو 500 اضافی اہلکار دیے گئے۔
آئی جی سندھ کی جانب سے جاری کردہ مراسلے میں کہا گیا ہے کہ نفری کو امن و امان برقرار رکھنے کے لیے استعمال کیا جائے گا۔
