اسلام آباد : شمالی وزیرستان میں وطن عزیز پر جان قربان کرنے والے پاک فوج کےافسران و جوان کو مکمل فوجی اعزاز کے ساتھ سپردخاک کردیا گیا۔
تفصیلات کے مطابق دہشت گردی کیخلاف جنگ میں پاک سرزمین پرجان نثار کرنے والے مسلح افواج کے افسران وجوان مکمل فوجی اعزاز کے ساتھ سپرد خاک کردیا گیا۔
شہید لیفٹیننٹ کرنل سید کاشف علی شہید کو اسلام آبادمیں سپردخاک کیا گیا، فوج کے چاک وچوبنددستے نے سلامی پیش کی جبکہ کیپٹن محمد احمد بدر شہید کو تلہ گنگ، حولدار صابر شہید کو خیبر، نائیک خورشید شہید کو لکی مروت میں سپرد خاک کیا گیا۔
سپاہی ناصر شہید کو پشاور، سپاہی راجا شہید کوہاٹ اور سپاہی ساجد شہید کی ایبٹ آبادمیں تدفین کی گئی۔
نماز جنازہ میں شہدا کے اہلخانہ، عزیز و اقارب، پاک فوج کے افسران اورشہری شریک ہوئے اور شہدا کو سلام عقیدت پیش کیا۔
شہید لیفٹیننٹ کرنل سید کاشف علی اور کیپٹن محمد احمد بدر کی نماز جنازہ گزشتہ روز چکلالہ میں اداکی گئی،نمازجنازہ میں صدرآصف علی زرداری، وفاقی وزیرخارجہ اوروزیر داخلہ شریک ہوئے تھے جبکہ چیئرمین جوائنٹ چیفس آف اسٹاف کمیٹی جنرل ساحرشمشاد،آرمی چیف جنرل عاصم منیر، سینئرفوجی افسران اورشہدا کے لواحقین نے بھی شرکت کی۔
شمالی وزیرستان کےعلاقےمیرعلی میں دہشت گردوں کےحملے میں لیفٹیننٹ کرنل سیدکاشف علی اور کیپٹن محمد احمد بدر سمیت سات فوجی جوان شہیدہوئے تھے۔
آئی ایس پی آر کا کہنا ہے جوانوں کی قربانیاں دہشت گردی کےخلاف سکیورٹی فورسز کےعزم کومزید مضبوط کرتی ہیں، مادر وطن سے دہشت گردی کے ناسور کے خاتمے تک جنگ جاری رہے گی۔
اے آر وائی نیوز کی ڈیجیٹل ڈیسک کی جانب سے شائع کی گئی خبریں