The news is by your side.

Advertisement

یونائیٹڈ نے قلندرز کو ڈھیر کر دیا

پی ایس ایل سکس کے بیسویں میچ میں عمدہ بولنگ کی بدولت اسلام آباد یونائیٹڈ نے لاہور قلندرز کو 28 رنز سے شکست دے دی۔

یونائیٹڈ کے 153 رنز کے جواب میں قلندرز کی پوری ٹیم 124 رنز پر ڈھیر ہو گئی۔ فخرزمان اور کپتان سہیل اختر کے سوا کوئی بیٹسمین زیادہ مزاحمت نہ کر سکا جب کہ 8 بیٹسمین ڈبل فیگرز میں داخل نہ ہوسکے۔

فخر زمان 4 چوکوں اور 2 چھکوں کی بدولت 44 جبکہ سہیل اختر 6 چوکوں اور ایک چھکے کی مدد سے 34 رنز بناکر آؤٹ ہوئے۔ گیارہویں نمبر پر بیٹنگ کے لیے میدان میں اترنے والے حارث رؤف نے 17 رنز بنائے۔

دیگر بلے بازوں میں ذیشان اشرف 1، محمد حفیظ 8، بین ڈنک 1، ٹم ڈیوڈ 3، راشد خان 4، جیمز فالکنر 1 اور شاہین شاہ آفریدی بغیر کوئی رن بنائے آؤٹ ہوئے۔ احمد دانیال 6 رنز بناکر ناٹ آؤٹ رہے۔

ابوظہبی کے شیخ زید اسٹیڈیم میں کھیلے گئے میچ میں اسلام آبادیونائیٹڈ نے لاہورقلندرز کیخلاف ٹاس جیت کربیٹنگ کا فیصلہ کیا تو قلندرز کے بولرز نے یونائیٹڈ کے پرخچے اڑا دیے۔

شاہین آفریدی نے پہلے ہی اوور میں عثمان خواجہ کو صفر پر چلتا کیا۔ ابتدائی نقصان کے بعد یونائیٹڈ کی بیٹنگ لائن ڈگمگاگئی اور صرف 20 کے مجموعے پر آدھی ٹیم پویلین لوٹ گئی۔

کولن منرو 4، روحیل نذیر ایک، حسین طلعت 8 اور کپتان شاداب خان 5 رنز کے مہمان ثابت ہوئے۔ مڈل آڈر کی ناکامی کے بعد جارح مزاج آصف علی اور افتخار احمد نے ٹیم کو سہارا دیا، دونوں بلے بازوں نے بولرز کا ڈٹ کر مقابلہ کیا اور میدان کے چاروں جانب دلکش اسٹروکس کھیلے۔

آصف علی اور افتخار کے مابین قیمتی 123 رنز کی پارٹنرشپ ہوئی جس نے مجموعے کو 150 تک پہنچایا۔ آصف علی نے تیزی سے اسکور میں اضافہ کیا اور ٹیم کو دباؤ سے نکالا۔ انہوں نے صرف 43 گیندوں پر 75 رنز بنائے جس میں 5 شاندار چھکے اور نصف چوکے شامل تھے۔

افتخار احمد آخری میں اوور میں چھکا لگا کر نصف سنچری بنانے کی کوشش میں کیچ تھما بیٹھے وہ ایک اسکور کی دوری سے ففٹی مکمل نہ کر سکے اور 49 رنز پر چلتے بنے۔

اسلام آباد یونائیٹڈ نے 7 وکٹوں کے نقصان پر 152 رنز بنائے۔ محمد وسیم 4 اور محمد موسیٰ صفر پر ناٹ آؤٹ رہے۔ قلندرز کی جانب سے سب سے کامیاب بولر جیمز فالکنر رہے جنہوں نے 3 وکٹیں حاصل کیں جب کہ شاہین آفریدی اور حارث رؤف نے دو دو کھلاڑیوں کو آؤٹ کیا۔

ٹاس کے بعد گفتگو کرتے ہوئے اسلام آبادیونائیٹڈ کے کپتان شاداب خان کا کہنا تھا کہ ٹاپ چھ بلے باز مکمل اوورز کھیلیں تو اچھی پوزیشن میں ہونگے،آج کے میچ میں حسن علی اورفہیم اشرف کومِس کریں گے۔

کپتان لاہور قلندرز سہیل اختر نے ٹاس کے بعد گفتگو کرتے ہوئے کہا کہ آج ٹیم میں ایک تبدیلی کی گئی ہے، فیضان کی جگہ ذیشان اشرف کو شامل کیا گیا ہے۔

سہیل اختر نے کہا کہ اسلام آباد کی اچھی ٹیم ہے، کوشش کریں گےکم ٹوٹل پر آؤٹ کریں، انہوں نے مزید کہا کہ ہماری ٹیم کا کمبی نیشن بہت اچھا بنا ہوا ہے۔

اس وقت پوائنٹس ٹیبل پر لاہور قلندرز سرفہرست ہے، اسلام آباد یونائیٹڈ کو ہراکر قلندرز اپنی پوزیشن مزید مستحکم کرنے کا خواہاں ہیں، یونائیٹڈز نےآج میدان مارا تولاہور سے پہلی پوزیشن چھین لیں گے۔

ملتان سلطانز نے پی ایس ایل کے بقیہ میچز کا آغاز کامیابی کیساتھ کیا تھا، جہاں انہوں نے دفاعی چیمپئن کراچی کنگز کو ہرا کر دو اہم پوائنٹس حاصل کئے تھے، اس کے باوجود ملتان کو پلے آف مرحلے میں جانے کیلئےکامیابی کا تسلسل برقرار رکھنا ہوگا۔

دوسرا میچ میں پشاور زلمی اور ملتان سلطانز کے درمیان رات گیارہ بجے مقابلہ ہوگا۔

Comments

یہ بھی پڑھیں