اسلام آباد: وزیراعظم شہباز شریف نے بارشوں کی صورتحال پر وفاقی و صوبائی اداروں کو الرٹ رہنے کی ہدایت کی ہے۔
تفصیلات کے مطابق وزیراعظم شہباز شریف نے مزید بارش کی پیش گوئی پر نیشنل ڈیزاسٹر مینجمنٹ اتھارٹی، صوبائی ڈیزاسٹر مینجمنٹ اتھارٹیزکو صورتحال کی کڑی نگرانی کی ہدایت کی ہے۔
وزیر اعظم شہباز شریف نے کہا کہ وفاقی ادارے صوبائی حکومتوں اور محکموں کے اشتراک عمل سےکام کریں، جہاں بھی جس چیز کی ضرورت ہو، عوام کے تحفظ اور مدد کے لئے فراہم کی جائے۔
وزیراعظم نے ہدایت جاری کرتے ہوئے کہا کہ جہاں ضرورت ہے وہاں عوام کو فوری محفوظ علاقوں میں منتقل کیا جائے، نیشنل ہائی وے اتھارٹی و دیگر متعلقہ ادارے بین الصوبائی قومی شاہراہوں کی مانیٹرنگ کریں۔
وزیراعظم شہبازشریف نے ہدایت کی کہ کوئٹہ کراچی شاہراہ اور بولان میں کوئٹہ سبی شاہراہ پر ٹریفک کی روانی کیلئےمؤثر انتظامات کیئے جائے، مختلف شاہراہوں اور متاثرہ علاقوں میں عوام کو خبردار رکھا جائے، عوام کی جان ومال کا تحفظ ہماری اولین ترجیح ہے۔
وزیر اعظم نے کہا کہ عوام سے بھی اپیل ہے بارشوں میں احتیاطی تدابیر اختیار کریں۔
