اسلام آباد: یوم استحصال کشمیر کے موقع پر وزیر اعظم پاکستان شہباز شریف نے مقبوضہ کشمیر میں انتخابی فہرستوں میں رد و بدل پر شدید تنقید کی ہے۔
تفصیلات کے مطابق وزیر اعظم شہباز شریف نے یوم استحصال کشمیر کے موقع پر اپنے پیغام میں کہا ہے کہ بھارتی حکام نے انتخابی حلقوں کی منتخب حد بندی کی ہے، موجودہ انتخابی فہرستوں میں رد و بدل کے لیے لاکھوں عارضی رہائشیوں کو شامل کیا گیا۔
وزیر اعظم پاکستان نے کہا بھارت نے ریاستی عوام کے حق خودارادیت کو کمزور کرنے کے لیے آبادی میں تبدیلیاں لانے کی کوشش کی، اور لاکھوں غیر ریاستی باشندوں کو جعلی ڈومیسائل جاری کیے گئے، پاکستان بھارت کے تمام یک طرفہ اور غیر قانونی اقدامات کو یکسر مسترد کرتا ہے۔
پاکستان سمیت دنیا بھر میں آج یوم استحصال کشمیر منایا جا رہا ہے
انھوں نے کہا بھارت کو مقبوضہ جموں و کشمیر کی خصوصی حیثیت کو یک طرفہ، غیر قانونی طور پر منسوخ کیے 4 سال بیت گئے، بھارت نے کشمیری عوام کو دبانے کے لیے طاقت اور تشدد کے وحشیانہ استعمال کا سہارا لیا، اس پر عالمی برادری کو مزید خاموش نہیں رہنا چاہیے، بھارت 7 دہائیوں سے مقبوضہ جموں و کشمیر پر قابض ہے۔
شہباز شریف کا کہنا تھا کہ جنوبی ایشیا کے لوگ امن اور استحکام کے خواہاں ہیں، امن ہندوستان اور پاکستان کے درمیان بامعنی بات چیت کے ذریعے ہی ممکن ہو سکتا ہے، پاکستان کشمیری عوام کی جدوجہد آزادی کی اخلاقی، سیاسی اور سفارتی حمایت جاری رکھے گا۔
