اسلام آباد : سابق وزیر داخلہ شیخ رشید کا کہنا ہے کہ اگر کراچی جاتے ہوا قتل ہوگیا تو آصف زرداری، بلاول بھٹو اور شہبازشریف ،محسن نقوی اورراناثنا مجرم ہوں گے۔
تفصیلات کے مطابق سابق وزیر داخلہ شیخ رشید کو جسمانی ریمانڈ مکمل ہونے پر اسلام آبادکی مقامی عدالت میں پہنچایا گیا۔
شیخ رشید عدالت پہنچنے پر لڑکھڑا کر گر گئے ، دھکم پیل کی وجہ سے شیخ رشید گرے تاہم پولیس حکام نے شیخ رشید کو سہارا دیا اور اٹھایا۔
اس موقع پر شیخ رشید نے میڈیا سے گفتگو کرتے ہوئے کہا کہ پانچ نام دیے ہیں میرے قاتل وہ ہوں گے ، نواز شریف ، محسن نقوی ، شہباز شریف ، آصف علی زرداری ، رانا ثنا اللہ میرے قتل میں ملوث ہوں گے۔
سابق وزیر داخلہ کا کہنا تھا کہ یہ مجھے کراچی بھیج رہے ہیں ، اگرمیں کراچی جاتے ہوئے قتل ہوگیا تو زرداری، بلاول اور شہبازشریف ، محسن نقوی اور راناثنا مجرم ہوں گے،ان پرمقدمہ کیا جائے۔
انھوں نے مزید کہا کہ جہاں مرضی میرےخلاف پرچہ ہویہ پانچ لوگ ہی میرے مجرم ہوں گے،میں عمران خان کے ساتھ کھڑا ہوں۔
گذشتہ روز عوامی مسلم لیگ کے سربراہ اور سابق وزیر داخلہ شیخ رشید نے اپنے خلاف قتل کی سازش رچائے جانے کا دعویٰ کیا تھا۔
تھانہ سیکریٹریٹ میں اپنے بھتیجے اور سابق رکن قومی اسمبلی شیخ راشد شفیق سے ملاقات کے دوران شیخ رشید نے کہاتھا کہ میرے قتل کی سازش کی جا رہی ہے۔
سربراہ عوامی مسلم لیگ کا کہنا تھا کہ میرے خلاف کراچی میں مقدمہ درج کیا گیا، بلاول بھٹو اور آصف علی زرداری نے سیاسی انتقام کے لیے مقدمہ درج کروایا۔
