پاکستان مسلم لیگ عوامی کے سربراہ شیخ رشید احمد نے کہا ہے کہ اللہ کے بعد سپریم کورٹ ہی ملک کو بچا سکتی ہے جلد الیکشن استحکام لا سکتے ہیں۔
اے آر وائی نیوز کے مطابق سینیئر سیاستدان شیخ رشید احمد جو ان دنوں نجی دورے پر لندن میں موجود ہیں، سماجی رابطوں کی ویب سائٹ ٹوئٹر پر ملکی سیاسی اور معاشی صورتحال پر اظہار خیال کرتے رہتے ہیں۔
سابق وفاقی وزیر شیخ رشید نے اپنے ٹویٹ میں کہا ہے کہ پاکستان تیکنیکی طور پر ڈیفالٹ ہوچکا ہے صرف اعلان کرنا باقی ہے۔ اللہ کے بعد سپریم کورٹ ہی ملک کو بچا سکتی ہے جلد الیکشن استحکام لا سکتے ہیں۔
سینیئر سیاستدان نے کہا کہ حکومت نے ملک کو تباہی کے دہانے پر لاکھڑا کیا ہے۔ آج ایل سیز نہیں کھلی رہیں، مہنگائی عروج پر ہے۔ آئی ایم ایف سے قسط مل رہی ہے اور نہ ہی باہر سے امداد مل رہی ہے۔ اوورسیز پاکستانی اس بات کے منتظر ہیں کہ کب انہیں ووٹ کا حق ملے گا۔
— Sheikh Rashid Ahmed (@ShkhRasheed) January 20, 2023
ان کا کہنا تھا کہ حالات اتنے سنگین ہیں کہ غریب پیسے دے کر آٹے کی لائن میں مر رہا ہے جب کہ حکمران صرف کابینہ میں معاون خصوصی بڑھائے جا رہے ہیں۔ لندن میں تو نواز شریف کے گھر کے باہر لوگ روز احتجاج کر رہے ہیں۔ عنقریب حکومت کے خلاف ملک میں ایسا احتجاج ہوگا کہ سناٹا پڑ جائے گا۔