کراچی: شہر قائد میں ہنی ٹریپ میں ملوث شنو گینگ کی سرغنہ شنو 3 جعلی سی ٹی ڈی اہل کاروں سمیت گرفتار ہو گئی۔
تفصیلات کے مطاب سی ٹی ڈی شعبہ تفتیش نے شہریوں کے اغوا اور بھتہ خوری میں ملوث خاتون اور جعلی سی ٹی ڈی اہل کاروں سمیت چار ملزمان کو گرفتار کر لیا۔
کاؤنٹر ٹیررازم شعبہ تفتیش نے یہ کارروائی کورنگی ڈھائی میں کی، انچارج سی ٹی ڈی چوہدری صفدر نے بتایا کہ ہنی ٹریپ میں ملوث شنو گینگ کی سرغنہ شنو کو گرفتار کر لیا گیا ہے، ملزمہ کے تین جعلی سی ٹی ڈی اہل کار ساتھی بھی گرفتار ہوئے ہیں۔
گرفتار ملزمان میں سجاد خان، ارباز اور سلمان شامل، ملزمہ شنو فون پر شہریوں سے دوستی کرتی تھی، موقع دیکھ کر منصوبہ بندی کے تحت مخصوص جگہ پر بلا لیتی۔
انچارج سی ٹی ڈی کے مطابق جب شہری شنو کے ہنی ٹریپ میں پھنس کر ایک مخصوص جگہ پہنچتے، تو شنو کے تینوں ساتھی بھی وہاں آ جاتے اور ملزمان خود کو سی ٹی ڈی اہل کار ظاہر کر کے شہری کو اغوا کر لیتے۔
چوہدری صفدر کے مطابق گرفتار ملزمان بلیک میلنگ کے ذریعے شہریوں سے بھاری رقم وصول کرتے تھے، شمائل نامی شہری سے 2 لاکھ روپے کی رقم وصول کی گئی، تاہم جب ملزمان بقایا 7 لاکھ روپے وصول کرنے پہنچے تو گرفتار کر لیے گئے۔
ملزمان کو مزید کارروائی کے لیے پولیس کے حوالے کیا جا رہا ہے۔ انچارج سی ٹی ڈی نے عوام سے اپیل کی کہ ایسے بلیک میلر عناصر کی فوری نشان دہی کریں، تاکہ ان کی سرکوبی کی جا سکے۔
