کراچی: سندھ حکومت نے الیکشن کمیشن کو آئی جی سندھ پولیس سید کلیم امام کو ہٹانے کے لیے درخواست لکھ دی۔
تفصیلات کے مطابق آئی جی سندھ کلیم امام کو ہٹانے کے لیے سندھ حکومت نے الیکشن کمیشن کو درخواست لکھی ہے۔ ترجمان سندھ حکومت مرتضیٰ وہاب نے کہا کہ آئی جی کی ایس پی عمرکوٹ سےذاتی رنجش نظر آتی ہے، آئی جی سندھ خود انڈر ٹرانسفر ہیں۔
مرتضیٰ وہاب نے کہا کہ مخالفین آئی جی کوضمنی انتخابات میں استعمال کرنا چاہتے ہیں، آئی جی کے ہوتے لگتا نہیں فری اینڈ فیئر ضمنی انتخاب ہوں گے۔
خیال رہے کہ آئی جی سندھ پولیس کلیم امام نےگزشتہ روز عمرکوٹ کے ایس پی، ڈی سی کے تبادلوں کی درخواست دی تھی۔
سندھ کےعوام نے آئی جی سندھ کو مسترد کردیا، مراد علی شاہ
یاد رہے کہ گزشتہ ماہ وزیراعلیٰ سندھ مراد علی شاہ نے سندھ اسمبلی میں اظہار خیال کرتے ہوئے کہا تھا کہ یہ سندھ اسمبلی عوام کے منتخب کردہ لوگوں کی ہے، عوام کے منتخب کردہ ایوان نے آئی جی سندھ کو مسترد کر دیا ہے۔
مراد علی شاہ کا کہنا تھا کہ صوبے کا افسر کس سے بات کرتا ہے کیا وہ مجھے نہیں پتہ چلتا؟ آئی جی پارٹی بن جائے تو ایسا پہلے کبھی نہیں دیکھا، صوبے میں وہی آئی جی چلے گا جو منتخب نمائندوں کی پالیسی پر ہوگا۔
