ممبئی: معروف شخصیات مداحوں کے ساتھ رابطہ رکھنے کے لیے سماجی رابطے کی ویب سائٹس پر کافی متحرک نظر آتی اور اپنی تصاویر شیئر کرتی ہیں جن کا مقصد مداحوں کے ساتھ وقتاً فوقتاً رابطہ رکھنا اور انہیں اپنے کام یا زندگی سے متعلق آگاہی دینا ہوتا ہے۔
سوشل میڈیا صارفین اور خصو صاً مداح تصاویر اور ویڈیوز کو نہ صرف پسند کرتے ہیں بلکہ اپنی ہردل عزیز شخصیت کو نئے روپ میں دیکھ کر خوش بھی ہوتے ہیں۔
آج ہم بات کررہے ہیں بالی ووڈ سپر اسٹار سلمان خان کی جنہوں نے اپنی ویڈیو سوشل میڈیا پر شیئر کی تو مداح انہیں کرکٹ کھیلتا دیکھ کر حیران رہ گئے۔
ویڈیو میں دیکھا جاسکتا ہے کہ دبنگ خان بائیں ہاتھ سے شاندار بلے بازی کرتے ہوئے دکھائی دے رہے ہیں، انہوں نے آف اور لیگ سائیڈ پر شاندار شاٹس کھیلے۔
Bharat Khelega… #onlocationstories @Bharat_TheFilm pic.twitter.com/PQfPPT7FwA
— Salman Khan (@BeingSalmanKhan) January 13, 2019
واضح رہے کہ سلمان خان کی 2018 میں ریلیز ہونے والی فلم ریس تھری ناکام ثابت ہوئی تھی اور اس سے قبل چینی اداکارہ کے ساتھ بنائی جانے والی فلم ٹیوب لائٹ بھی باکس آفس پر ناکام ثابت ہوئی تھی۔
مزید پڑھیں: سلمان خان کی موجودگی میں کترینہ کیف کو شادی کی پیش کش۔۔۔ ویڈیو دیکھیں
سال 2019 میں سلمان خان فلم بھارت کی شوٹنگ میں مصروف ہیں، فلم کی کاسٹ میں کترینہ کیف، تبو، جیکی شروف، سنیل گروور، دیشا پتانی اور نورا فتحی شامل ہیں۔ فلم کے ہدایت کار علی عباس ظفر ہیں۔ فلم آئندہ سال عید پر نمائش کے لئے پیش کی جائے گی۔
سلمان خان نے حال ہی میں فلم ’بھارت‘کے دوسرے شیڈول کی عکس بندی ابوظہبی میں مکمل کروائی ہے۔ اس موقع پر اداکار نے ابوظہبی کو اپنا دوسرا گھر قرار دیتے ہوئے کہا کہ انھیں یہاں اپنے قیام کے دوران ممبئی جیسا ہی محسوس ہوتا رہا۔
