نئی دہلی: بھارتیہ جنتا پارٹی کی مرکزی وزیر اور سابقہ اداکارہ سمرتی ایرانی صحافی کے سوالات پر بھڑک اٹھیں اور اخبار کے مالک سے شکایت کرنے کی دھمکی دے ڈالی۔
غیر ملکی میڈیا رپورٹس کے مطابق بے جے پی سے تعلق رکھنے والی مرکزی وزیر سمرتی ایرانی نے صحافی کی جانب سے سوالات کرنے پر ناراضگی کا اظہار کیا۔ ان کی یہ ویڈیو مخالف پارٹی کانگریس کی طرف سے شیئر کی گئی ہے۔
معاملہ کچھ یوں ہے کہ وہ اتر پردیش میں اپنے حلقے امیٹھی کے دورے پر آئی ہوئی تھیں کہ اس دوران مقامی صحافیوں نے انھیں گھیر لیا اور مختلف سوالات پوچھنا شروع کردیے ۔
اس دوران وزیر نے برہمی کا اظہار کرتے ہوئے کہا کہ ان کے حلقے کے لوگوں کی توہین کی جا رہی ہے۔ انھوں نے کہا کہ اگر ان کے حلقے کے لوگوں کی توہین کی گئی تو وہ خاموش نہیں رہیں گی۔ اس پر صحافی کا کہنا تھا کہ میں صرف سوال کررہا ہوں میرا مقصد کسی کی توہین کرنا نہیں ہے۔
صرف اتنی سی بات پر سمرتی ایرانی سیخ پا ہوگئیں اور اپنی گاڑی میں بیٹھتے ہوئے مذکورہ صحافی کو مخاطب کرتے ہوئے کہا کہ وہ اخبار کے مالک سے شکایت کریں گی اور وہاں سے چلی گئیں۔
