ڈربن: جنوبی افریقہ کے ٹاپ ریپر کیرنن فوربس کو ان کے دوست سمیت گولی مار کر قتل کر دیا گیا۔
غیر ملکی میڈیا رپورٹس کے مطابق جنوبی افریقہ کے معروف ریپرز میں سے ایک کیرنن فوربس کو ساحلی شہر ڈربن میں ایک نائٹ کلب کے باہر گولی مار کر ہلاک کر دیا گیا۔
بی بی سی کے مطابق کیرنن فوربس کو ایک نائٹ کلب کے باہر نامعلوم حملہ آور نے ان کے قریبی دوست، شیف اور کاروباری شخصیت ٹیبیلو ‘ٹبز’ موٹسوانے کے ساتھ قتل کر دیا۔
رپورٹس کے مطابق کیرنن فوربس اپنی سال گرہ کی تقریبات کے سلسلے میں ایک تقریب میں پرفارمنس کے لیے دوست کے ساتھ نائٹ کلب جا رہا تھا، پولیس ترجمان نے برطانوی نشریاتی ادارے کو بتایا کہ ریپر اور ان کا دوست کار پارک کر کے جانے لگے تو 2 مسلح افراد ان کے قریب پہنچے اور انھیں قریب سے گولی مار دی۔
CCTV depicting the fatal shooting of Kiernan Jarryd Forbes, professionally known as AKA. The footage shows the deceased being fatally shot in the head. The incident is being investigated as a murder, with the circumstances surrounding the event being considered a cold-blooded act pic.twitter.com/YuASqDPi5W
— GIDI (@Gidi_Traffic) February 12, 2023
پولیس کا کہنا ہے کہ قتل کے محرکات کی تحقیقات کی جا رہی ہیں، حملہ آور واردات کے بعد پیدل ہی موقع سے فرار ہو گئے تھے۔
اپنی موت سے چند گھنٹے قبل 35 سالہ گلوکار نے اپنے آنے والے البم ’ماس کنٹری‘ کے بارے میں سوشل میڈیا پر ایک پوسٹ کی، یہ البم اس ماہ کے آخر میں ریلیز ہونے والا ہے۔
واضح رہے کہ ریپر کیرنن فوربس نے ایک ریپ گروپ سے اپنے کیریئر کا آغاز کیا تھا اور پھر بہت جلد کی موسیقی کی دنیا میں اپنا منفرد مقام بنا کر سولو کیریئر شروع کیا، وہ متعدد بین الاقوامی میوزک ایوارڈز میں بھی نامزدگی حاصل کر چکے ہیں۔
پولیس نے کہا ہے کہ وہ اس بارے میں قیاس آرائی نہیں کرنا چاہتے کہ آیا یہ قتل کسی شہرت کے نتیجے میں ہوا ہے، تاہم ان کا کہنا ہے کہ اس امکان کو رد نہیں کیا جا سکتا۔
