کوئٹہ: چند ماہ کے خاموشی کے بعد اسپیکر بلوچستان اسمبلی اور وزیراعلیٰ ایک بار پھر آمنے سامنے آگئے۔
تفصیلات کے مطابق اسپیکر بلوچستان عبدالقدوس بزنجو نے وزیراعلیٰ بلوچستان جام کمال پر الزامات کی بوچھاڑ کردی اور کہا کہ تین سال سے جام کمال میرے حلقے میں مداخلت کررہے ہیں، اس لئے خاموش رہا کہ پارٹی اور اپنی حکومت کو کوئی نقصان نہ پہنچے، میری خاموشی کو کمزوری سمجھا گیا۔
عبدالقدوس بزنجو نے کہا کہ خاموش اس لئے رہا کہ وقت کے ساتھ وزیراعلیٰ چیزوں کو بہتر کرینگے مگر دن بدن حالات بہتری کی بجائے ابتری کی طرف گئے، اب کسی صورت خاموش نہیں رہوں گا، پارٹی کو نقصان پہنچا تو جام کمال ذمے دار ہونگے۔
اسپیکر عبدالقدوس بزنجو نے دعویٰ کیا کہ مجھ سمیت بہت سے ارکان وزیراعلیٰ کے روئیے سے نالاں ہیں، وزیراعلیٰ اپنی ہی جماعت کے لوگوں کوانتقام کا نشانہ بنارہےہیں۔
بلوچستان عوامی پارٹی کے اہم رہنما کا کہنا تھا کہ جام کمال کے رویے کےباعث پارٹی محدود ہوکررہ گئی، بی اے پی بنانے کا مقصد بلوچستان کےعوام کی خدمت کرنا تھا۔
دوسری جانب ذرائع کا کہنا ہے کہ بلوچستان کی موجودہ صورت پر چیئرمین پاکستان پیپلز پارٹی بلاول بھٹو نے اسپیکر بلوچستان اسمبلی عبدالقدوس بزنجو سے رابطہ کیا ہے اور صوبے کی موجودہ سیاسی صورت حال پر تبادلہ خیال کیا ہے۔
واضح رہے کہ وزیراعلیٰ بلوچستان جام کمال اور اسپیکر عبدالقدوس بزنجو کے درمیان سرد مہری تو پچھلے دو سالوں سے ہے، جو اس وقت پیدا ہوئی جب وزیر اعلیٰ بلوچستان جام کمال نے آواران میں ہونے والے ترقیاتی کاموں کی جانچ پڑتال کے لیے وزیر اعلیٰ کی معائنہ ٹیم کو بھجوایا۔
کچھ عرصے سے قبل وزیراعلیٰ بلوچستان کے خلاف عدم اعتماد کی باتوں نے زور پکڑا تو اسپیکر بلوچستان اسمبلی اور وزیر اعلیٰ کے درمیان بھی اختلافات کی خلیج گہری ہوتی چلی گئی۔
