اسلام آباد : اسپیکر قومی اسمبلی ایاز صادق نے گرفتار پی ٹی آئی اراکین قومی اسمبلی کورہا کرنے کاحکم دے دیا اور کہا معززارکان کی تذلیل کسی صورت برداشت نہیں کروں گا۔
تفصیلات کے مطابق اسپیکر قومی اسمبلی ایاز صادق کے طلب کرنے پر آئی جی اسلام آباد فوری پہنچے۔
ایاز صادق نے آئی جی اسلام آباد ناصر رضوی کو گرفتار ایم این ایزکو رہا کرنے کا حکم دیتے ہوئے گزشتہ رات پیش آنے والے واقعے کی رپورٹ طلب کرلی۔
اسپیکر نے کہا ایوان کے معزز ارکان کی تذلیل کسی صورت برداشت نہیں کروں گا اور گرفتار تمام ایم این ایز کو پارلیمنٹ ہاؤس لانے کی ہدایت کردی۔
مزید پڑھیں : پی ٹی آئی رہنماؤں کی گرفتاری، اسپیکر قومی اسمبلی کا واقعے پر ایکشن لینے کا اعلان
اس سے پہلے اسپیکر نے آئی جی اسلام آباد کے ساتھ آئی جی آپریشنزسیدعلی رضا اور ایس ایس پی آپریشنز کو بھی فوری طلب کیا تھا۔
یاد رہے اسپیکر ایاز صادق نے گزشتہ روز اسلام آباد پولیس کے پارلیمنٹ ہاؤس سے پی ٹی آئی اراکین اسمبلی کی گرفتاری کے واقعے پر ایکشن لینے کا اعلان کیا تھا۔
ایاز صادق نے اپنی رولنگ دیتے ہوئے کہا تھا کہ کل رات جو کچھ ہوا ہے، اس پر یقینی طور پر ایکشن لینا پڑے گا۔ میں نے کل رات کی تمام فوٹیجز منگوا لی ہیں۔ ان فوٹیجز کو دیکھ کر ذمے داروں کا تعین کیا جائے گا اور ان کے خلاف کارروائی کی جائے گی
