کراچی: اسٹیٹ بینک کا کہنا ہے کہ غیرمقیم کمپنیوں کے لیے ٹیکس نظام آسان کردیا گیا ہے، قرضہ آلات اور حکومتی سیکیورٹیز میں ٹیکس نظام کو سادہ بنایا گیا۔
تفصیلات کے مطابق اسٹیٹ بینک کی جانب سے جاری کردہ اعلامیہ میں کہا گیا ہے کہ ٹیکس نظام آسان بنانے کے لیے انکم ٹیکس آرڈیننس 2001میں ترامیم کی گئی، آرڈیننس میں ترامیم کا مقصد کیپٹل مارکیٹس کو فروغ دینا ہے۔
اعلامیے میں کہنا ہے کہ غیرمقیم افراد کو اسپیشل کنورٹبل اکاؤنٹ سے سرمایہ کاری کی اجازت ہے، سرمایہ کاری قرضہ آلات اور حکومتی سیکیورٹیز میں کی جاسکتی ہے، قرضے پر ودہولڈنگ ٹیکس اور کیپٹل گین ٹیکس لاگو ہیں۔
اسٹیٹ بینک کے مطابق کیپٹل گین ٹیکس 10فیصد کی شرح پر ودہولڈنگ سے مشروط ہوگا، ایس سی آر اے میں ٹرانزکشنز پر0.6 فیصد ٹیکس کی کٹوتی نہیں ہوگی، کیپٹل گین پرپیشگی ٹیکس کی کوئی ادائیگی نہیں ہوگی۔
اعلامیہ اسٹیٹ بینک میں یہ بھی کہا گیا ہے کہ فائلر اور نان فائلر میں کوئی امتیاز نہیں ہوگا۔
