لاہور : پاکستان سنی تحریک نے آئندہ عام انتخابات میں حصہ لینے کا اعلان کر دیا، تحریک کے سربراہ ثروت اعجاز قادری نے کہا ہے کہ حکومت کی الٹی گنتی شروع ہو چکی ہے، کارکن الیکشن کی تیاری کریں۔
انہوں نے کہا کہ ہمارا مقابلہ سیاسی چوروں، ٹھگوں اور ڈاکوؤں سے ہے۔ ان خیالات کا اظہار انہوں نے لاہور مال روڈ پر سنی تحریک کے زیراہتمام منعقد ہونے والے روشن پاکستان مارچ سے خطاب کرتے ہوئے کیا۔
ثروت اعجاز قادری نے کہا کہ وزیراعظم اپنی کرسی بچانے کیلئے میدان میں اتر آئے ہیں مگر اب یہ قوم مزید بیوقوف نہیں بنے گی۔
انہوں نے آئندہ عام انتخابات میں حصہ لینے کا اعلان کرتے ہوئے کہا کہ اب چہرے نہیں نظام بدلیں گے۔ سنی تحریک کے سربراہ کا کہنا تھا کہ ملک 75 ارب ڈالر کا مقروض ہو چکا ہے، اگر صرف نواز شریف اور زرداری کے اثاثے ملک میں واپس آ جائیں تو غربت ختم ہو سکتی ہے۔
ثروت اعجاز قادری نے کہا کہ پاکستان کے ہر صوبے کو بلال اکبر جیسے جرنیلوں کی ضرورت ہے۔ عزیر بلوچ، متحدہ قومی موومنٹ کے قائد اور پاکستان میں موجود را کے ایجنٹوں کو پھانسی پر لٹکانا ضروری ہے۔
واضح رہے کہ سنی تحریک 13 مئی کو حیدرآباد، 26 مئی کو راولپنڈی، 15 اگست کراچی نشتر پارک اور 20 اگست کو لاہور مینار پاکستان پر جلسے کرے گی۔
