اسلام آباد : کرتارپور راہداری کے افتتاح میں شرکت کے لئے نوجوت سنگھ سدھو کے ساتھ بالی ووڈ اداکار سنی دیول بھی پاکستان آئیں گے ، وزیراعظم عمران خان کل کرتارپورراہداری کا افتتاح کریں گے۔
تفصیلات کے مطابق کرتارپور راہداری کے افتتاح کے موقع پر بھارت سے آنے والے وفد میں نامور بالی ووڈ اداکار سنی دیول بھی شامل ہوں گے، گزشتہ روز بھارتی پنجاب کے وزیراعلیٰ کیپٹن امریندر سنگھ نے اداکار سنی دیول کی پاکستان آمد کی تصدیق کی۔
بھارتی میڈیا کے مطابق سنی دیول کے علاوہ بھارتی وفد میں سابق وزیراعظم من موہن سنگھ اور بھارتی پنجاب کے وزیراعلیٰ بھی شامل ہوں گے جبکہ نوجوت سنگھ سدھو کرتارپور آنے والے پہلے بھارتی وفد میں شامل ہوں گے۔
مزید پڑھیں : نوجوت سنگھ سدھو کو پاکستان آنے کی اجازت مل گئی
سابق بھارتی کرکٹر نوجوت سنگھ سدھو نے کرتارپور راہداری افتتاح کی تقریب میں شرکت کی اجازت کے لیے بھارتی حکومت کو 3 خط لکھے تھے، جس کے بعد انہیں بھارتی وزیر خارجہ کی جانب سے کرتارپور افتتاحی تقریب میں شرکت کی اجازت مل گئی تھی۔
واضح رہے کہ اداکار و سیاستدان سنی دیول کا تعلق بھارتی پنجاب کے ضلع گورداس پور سے ہے اور سنی دیول نے بھارتی الیکشن میں بی جے پی کے پلیٹ فارم سے ضلع گوردار پور سے حصہ لیا تھا۔
خیال رہے بابا گورونانک کے پانچ سو پچاس ویں تاریخی جنم دن پر کرتارپور راہداری کا افتتاح کرنے کی تیاریاں زورشور سے جاری ہیں، وزیراعظم عمران خان کل کرتارپور راہداری کا افتتاح کریں گے۔
