سپریم کورٹ کی جانب سے فوجی عدالتوں میں سویلینز کا ٹرائل جاری رکھنے کے حوالے سے تحریری حکم نامہ جاری کردیا گیا ہے۔
تفصیلات کے مطابق سپریم کورٹ کا فوجی عدالتوں سے متعلق حکم نامہ 5 صفحات پر مشتمل ہے۔ آرمی ایکٹ کی دفعات ڈی 2 ون اور ذیلی شقیں 1 اور 2 کو کالعدم قرار دینے کا فیصلہ معطل کردیا گیا ہے۔
حکم نامے میں کہا گیا ہے کہ آرمی ایکٹ کا سیکشن 59(4) کالعدم قرار دینے کا فیصلہ بھی معطل کیا جاتا ہے۔ فوجی عدالتیں ملزمان کا ٹرائل کرسکتی ہیں لیکن حتمی فیصلہ نہیں سنائیں گی۔
بنچ کی تشکیل نو اور کارروائی براہ راست دکھانے کی درخواستیں آئندہ سماعت پر سنی جائیں گی۔ جسٹس مسرت ہلالی نے حکم امتناع جاری کرنے کی مخالفت کی۔
حکم نامے میں کہا گیا کہ فوجی عدالتوں میں ٹرائل روکنے کے فیصلے کی تفصیلات سامنے نہیں آسکیں۔ فوجی عدالتوں کیخلاف درخواست گزاروں کو نوٹس بھی جاری کیا گیا۔
نوٹس نہ ہونے کے باوجود کچھ وکلا پیش ہوئے، تفصیلی فیصلے تک سماعت موخر کرنے کی استدعا کی۔ حکم نامے کے مطابق مقدمے کی مزید سماعت جنوری کے تیسرے ہفتے میں ہوگی۔
