پاکستانی ٹی وی اسکرین پر اداکاری کے جوہر دکھانے والی معروف اداکارہ اور پروفیسر تزئین حسین کا کہنا ہے کہ میں نے پسند کی شادی کی تھی۔
اے آر وائی نیوز کے پروگرام شان سحور میں کئی سالوں بعد اداکارہ تزئین حسین نے شرکت کی اور اپنے بارے میں ناظرین کو آگاہ کرتے ہوئے بہت سی باتیں شیئر کیں۔
پی ٹی وی کے سینئر اور لیجنڈ اداکار طلعت حسین کی بیٹی اداکارہ تزئین حسین گزشتہ طویل عرصے سے شعبہ درس و تدریس سے وابستہ ہیں اور مختلف جامعات میں بطور ایسوسی ایٹ پروفیسر اور ڈپارٹمنٹ ہیڈ کے طور پر فرائض انجام دے رہی ہیں۔
پروگرام کی میزبان ندا یاسر کے ایک سوال کا جواب دیتے ہوئے انہوں نے بتایا کہ میری شادی پسند سے ہوئی تھی لیکن میرے شوہر زاہد کا تعلق شوبز سے نہیں تھا وہ ایک کاروباری شخصیت تھے۔
انہوں نے بتایا کہ کہ بہت کم لوگ اس بارے میں جانتے ہیں کہ ہم چند قریبی دوستوں کا ایک گروپ تھا جس میں سب کی شادیاں ہوگئیں صرف ہم دونوں ہی بچ گئے تھے تو سوچا کیوں نہ ہم دونوں ہی شادی کرلیں۔
