تلنگانہ: بھارتی ریاست تلنگانہ میں شادی سے ایک دن قبل دولھے کی دردناک موت نے گھر ماتم کدے میں بدل دیا۔
تفصیلات کے مطابق تلنگانہ کے ضلع محبوب آباد کے ایک علاقے میں شادی سے ایک دن قبل کرنٹ لگنے سے دولھا ہلاک ہو گیا، جس کے باعث شادی کا گھر ماتم کدہ بن گیا۔
یہ افسوسناک واقعہ کوموگوڈیم کے تانڈہ میں پیش آیا، 21 سالہ یاکوب کی شادی گارلا منڈل سے تعلق رکھنے والے بوڈا شیوا کی بیٹی سے طے پائی تھی، تاہم کرنٹ لگنے سے اچانک اس کی موت واقع ہو گئی۔
حیدر آباد شہر میں کنٹریکٹ کی بنیاد پر کام کرنے والے نوجوان یاکوب کی شادی جمعہ 12 مئی کو مقرر تھی، تمام رشتہ دار شادی کے لیے دولھے کے گھر میں جمع ہو گئے تھے۔
رپورٹ کے مطابق شادی والے گھر میں پانی ختم ہونے کی وجہ سے یاکوب نے بورویل کی موٹر کو آن کیا، لیکن بدقسمتی سے اسے اچانک کرنٹ کا زور کا جھٹکا لگ گیا، جس سے وہ نیچے گر گیا، اور اس کے ساتھ ہی اس کی موت واقع ہو گئی۔
یاکوب کی اچانک موت سے دلہن کے گھر میں بھی کہرام مچ گیا۔
