سچن ٹنڈولکر کو دنیائے کرکٹ کے چند بڑے بیٹسمینوں میں شمار کیا جاتا ہے، تاہم ان کے کیریئر میں ایک پاکستانی بائولر ایسا بھی رہا جس کے سامنے سچن کو اپنی وکٹ بچانے کے لالے پڑ جاتے تھے!
قومی آل رائونڈر عبدالرزاق بھارتی ماسٹر بلے باز کو ہمیشہ سے ایک مشکل بائولر لگے جس کا انھوں نے اعتراف بھی کیا ہے، انٹرنیشنل کرکٹ میں اکثر و بیشتر پاکستانی آل رائونڈر نے سچن ٹنڈولکر کو مشکلات کا شکار کیا اور ان کی وکٹ لینے میں کامیاب رہے۔
سچن کے مطابق اپنے کیریئر میں ان کے لیے عبدالرزاق کی گیندوں کو کھیلنا ہمیشہ سے چیلنجنگ رہا، یہاں تک کہ اپنے کیریئر کی بلندی پر بھی پاکستانی میڈیم پیسر ان کے لیے پریشانی کا باعث رہے۔ اس لیے سچن، عبد الرزاق کو سب سے خطرناک گیندباز مانا کرتے تھے۔ حالانکہ اس دور کے دوسرے بیٹسمینوں کے لیے رزاق اتنے مشکل بائولر ثابت نہیں ہوئے لیکن سچن کی وکٹ کے معاملے میں قسمت ہمیشہ ان پر مہربان رہی۔
ایک پوڈ کاسٹ میں گفتگو کرتے ہوئے عبدالرزاق کا کہنا تھا کہ یہ ٹنڈولکر کا بڑا پن ہے کہ انھون نے میرا نام لیا ورنہ تو اس دور میں بڑے بولرز کی ایک طویل فہرست موجود ہے جن میں میک گرا، وسیم اکرم، وقار یونس، کرٹلی ایمبروز، کرٹنی والش جیسے بڑے بڑے نام شامل ہیں۔
