ممبئی: بالی ووڈ کی نئی فلم ’ٹھاکرے‘ ریلیز کے چند گھنٹے بعد ہی انٹرنیٹ پر لیک ہوگئی۔
تفصیلات کے مطابق ابھیجیت پانسے کی ہدایت کاری میں بنائی جانے والی ’ٹھاکرے‘ فلم میں باصلاحیت اداکار نوازالدین صدیقی ہندو انتہاء پسند رہنما بال ٹھاکرے کا کردار ادا کررہے ہیں۔
یہ فلم بال ٹھاکرے کی زندگی پر بنائی گئی ہے جس میں نوازالدین صدیقی کے ساتھ امریتا راؤ نے بھی مرکزی کردار ادا کیا، اب تک ٹھاکرے کو ملا جلا ردعمل ملا البتہ بالی ووڈ فلمی تجزیہ نگار ترن آدرش نے نوازالدین کی اداکاری اور فلم کو تھری اسٹار دیے۔
مزید پڑھیں: نواز الدین صدیقی ہندو انتہا پسند کیوں بن گئے؟
یہ بھی پڑھیں: بھارتی الیکشن، ووٹرز کی سوچ فلموں کے ذریعے تبدیل کرنے کی تیاری
اس فلم میں مہارشٹرا کے ہندو انتہاء پسند رہنما بال ٹھاکرے کے مختلف روپ دکھائے گئے جس میں اُن کی سیاسی جماعت کی تشکیل، بابری مسجد کی شہادت اور مسلمانوں پر مظالم وغیرہ قابل ذکر ہیں۔
ٹھاکرے سینیما گھروں میں ریلیز ہوئی تو اُس کے چند گھنٹے بعد ہی تامل راکرز نے مکمل فلم انٹرنیٹ پر لیک کردی جسے ٹورنٹ سے ڈاؤن لوڈ کیا جاسکتا ہے۔ حیران کن طور پر تامل راکرز نے اس فلم کے ہندی کے علاوہ تیلگو، تامل، ملائل اور انگریزی ورژن بھی انٹرنیٹ پر لیک کیا۔
یاد رہے کہ تامل راکرز حال ہی میں ریلیز ہونے والی ’اڑی سرجیکل اسٹرائیک، وائی چیٹ انڈیا، ایکسڈنٹل پرائم منسٹر، سمبا، زیرو‘ بھی انٹرنیٹ پر لیک کرچکے ہیں جبکہ ہیکرز گروپ نے متعدد تامل فلمیں بھی ریلیز کیں۔
