لندن: چین سے دنیا بھر میں تیزی سے پھیلنے والے کروناوائرس کا برطانوی پارلیمنٹ تک پہنچنے کا خطرہ سامنے آگیا۔
اے آر وائی نیوز کے مطابق برطانوی لیبر پارٹی کے 2 ممبران پارلیمنٹ کے کروناوائرس ٹیسٹ مکمل کے گئے ہیں تاہم اب تک رپورٹ سامنے نہیں آئی، مذکورہ اراکین کو رپورٹ کا انتظار ہے۔
مہلک وائرس کے خطرے کے پیش نظر دونوں ممبران پارلیمنٹ کو علیحدہ مقام پر منتقل کردیا گیا ہے۔ تاہم انہیں کروناوائرس کا مرض لاحق ہے یا نہیں یہ کہنا قبل از وقت ہوگا، رپورٹ کے بعد ہی حقیقت سامنے آئے گی۔
دوسری جانب برطانیہ کے رکن اسمبلی نے انکشاف کیا ہے کہ انہوں نے کرونا وائرس کا ٹیسٹ کروایا جس کا رزلٹ مثبت آیا۔
رکن اسمبلی میں کرونا وائرس کی تشخیص
خیال رہے کہ لیڈز نارتھ ویسٹ اسمبلی کے بلدیاتی رکن اسمبلی الیکس سوبل نے تصدیق کی کہ انہیں اپنی طبیعت اچھی محسوس نہیں ہورہی تھی جس کے بعد انہوں نے ٹیسٹ کروانے کا فیصلہ کیا۔
رکن اسمبلی نے بتایا کہ انہوں نے ایک کانفرنس میں جانے سے قبل کرونا وائرس کا ٹیسٹ کروایا جس میں مرض کی تشخیص ہوئی مگر اس کی شدت بہت کم تھی جس کے باعث رپورٹ مثبت آئی۔
