سوئیڈن میں عیدالاضحیٰ کے موقع پر مسجد کے باہر قرآن پاک کی بے حرمتی کا اسی ملک میں بھرپور جواب دیا گیا اور ہزاروں افراد قرآن پاک اٹھائے نکل آئے۔
سوئیڈن کے شہر مالمو میں ہزاروں افراد قرآن پاک کی حرمت میں کتاب اللہ کے نسخے اپنے سروں پر اٹھا کر سینے سے لگا کر ایک جگہ جمع ہوئے تو اجتماع روح پرور بن گیا۔
یہ ویڈیو سوشل میڈیا پر وائرل ہوگئی ہے جس کودیکھ کر ہر مسلمان کا دل مسرور ہوگیا ہے۔ اس موقع پر اجتماع کے شرکا کی بڑی تعداد بلند آواز میں کلام پاک کرتی رہی جب کہ مقامی زبان میں نعرے بھی لگائے گئے جس کے معنی ہیں کہ ’’میں اسے حفظ کروں گا۔‘‘
مظاہرین کا کہنا تھا کہ کل ایک قرآن پاک کی توہین کی گئی تو آج اس کی حرمت میں ہزاروں قرآن پاک نکل آئے۔ کتاب اللہ وہ ہے جس کو کوئی جتنا مٹانے کی کوشش کرے گا وہ اتنا ہی زیادہ پھلے اور پھولے گا۔
اس سے قبل جس مقام پر قرآن پاک کی بے حرمتی کی گئی تھی اسی جگہ پر بھی اس ناپاک جسارت کے خلاف احتجاجی مظاہرہ کیا گیا جس میں مختلف ممالک سے تعلق رکھنے والے ہزاروں مسلمانوں نے شرکت کی تھی۔
واضح رہے کہ سوئیڈن کے شہر اسٹاک ہوم کی ایک مسجد کے باہر عیدالاضحیٰ کے روز قرآن پاک کی بے حرمتی کا واقعہ پیش آیا تھا۔ جس کے خلاف پاکستان سمیت دنیا کے مختلف ممالک میں عوامی اور سرکاری سطح پر بھرپور احتجاج کیا اور جاری بھی ہے۔
اقوام متحدہ، یورپی یونین، امریکا، روس سمیت کئی غیر اسلامی ممالک نے بھی اس مکروہ عمل کی مذمت کی ہے۔
