غلطیاں ہر ایک سے ہوتی ہیں اگر آپ سے بھی ہوئی ہیں تو معافی مانگ لیں کیونکہ آج معاف کرنے اور معافی مانگنے کا عالمی دن ہے۔
انسان خطا کا پُتلا ہے اسی لیے لاکھ احتیاط کے باوجود بھی غلطیاں سرزد ہو ہی جاتی ہیں لیکن بڑا انسان وہی ہوتا ہے جو غلطی پر ڈھٹائی کے بجائے اس کو تسلیم کرے اور درست کرنے کی کوشش کرے۔ غلطی تسلیم کرکے معافی مانگنا اور سامنے والے کا معاف کر دینا انسان کی عظمت کی دلیل ہے۔
غلطی تسلیم کرکے معافی مانگنے اور معاف کرنے کو کوئی چھوٹا یا بڑا نہیں ہو جاتا بلکہ دوسرے کی خطاؤں کو درگزر کرنے سے معاف کرنے والے اور معافی مانگنے والے دونوں کے درمیان رشتہ پہلے کی نسبت زیادہ گہرا ہو جاتا ہے۔
رشتے خونی ہوں یا دوستی کے انمول ہوتے ہیں جس کو درگزر اور برداشت کی عادت مزید توانا اور خوبصورت بناتی ہے جب کہ انا رشتوں میں بگاڑ پیدا کرکے انہیں تباہ کرتی ہے۔
آج معاف کرنے یا معافی مانگنے کا عالمی دن منایا جا رہا ہے اس لیے اگر آپ سے بھی کوئی غلطی ہوئی ہے تو اس کو درست کرنے اور رشتوں کو مضبوط کرنے کے لیے انا کو بالائے طاق رکھ کر معافی مانگ لیں اور اگر کوئی آپ سے معافی مانگتا ہے تو دل بڑا کرکے اسے معاف کر دیں کہ اسلام بھی ہمیں یہی درس دیتا ہے۔
