بھارتی ریاست تلنگانہ کے جنگل میں بارش کے سبب محصور ہوجانے والے 130 سیاحوں کو بحفاظت ریسکیو کرلیا گیا، دریا کی سطح میں اضافے کی وجہ سے یہ افراد وہاں پھنس گئے تھے۔
غیرملکی میڈیا رپورٹس کے مطابق ضلع ملگ میں سیاحوں کا گروپ جنگل میں واقع آبشار کے نظارے سے لطف اندوز ہونے گیا تھا، اس دوران بارش ہوگئی جس سے دریا کی سطح بلند ہونے لگی اور ان افراد کے لیے وہاں سے نکلنا مشکل ہوگیا۔
یہ افرد برسات کے دوران آبشار کا نظارہ دیکھنا چاہتے تھے جو ان کے لیے پریشان کن صورتحال کا باعث بن گیا جب کہ اندھیرا چھا جانے سے وہ جنگل میں ہی پھنس کر رہ گئے۔
سیاحوں کی جانب سے پولیس کنٹرول روم کو فون پر اطلاع دی گئی، آدھی رات کے قریب پولیس، این ڈی آر ایف اور ڈی ڈی آر ایف کی ٹیمیں ان افراد کو بحفاظت ریسکیو کرنے کے مشن پر نکلیں۔
Over 100 #tourists who were #stranded in the dense forest and overflowing stream, while went to watch #Telangana 's biggest #waterfalls #Muthyaladhara in #Mulugu dist, #rescued safely by the SDRF, NDRF, @MuluguSP police teams and govt officials.#TelanganaRains #Muthyamdhara pic.twitter.com/T36n6p7ynI
— Surya Reddy (@jsuryareddy) July 26, 2023
متاثرین کو بچانے کے لیے ریسکیو آپریشن کئی گھنٹوں تک جاری رہا، پھنس جانے والے سیاحوں کا تعلق اضلاع ورنگل اور کریمنگر سے بتایا جاتا ہے۔
رات تقریباً دو سے ڈھائی بجے کے درمیان سیاحوں کو جنگل سے بحفاظت نکال لیا گیا جب کہ ریسکیو ٹیمیں اپنے ساتھ غذا اور پانی کی بوتلیں بھی لے کر گئی تھیں۔
