کراچی : لاک ڈاؤن کی پابندیوں اور کورونا ایس او پیز پر عمل نہ کرنے والے موٹر سائیکل سواروں کیلئے ایک اور مشکل کھڑی ہوگئی۔ ٹریفک پولیس ایک کے بجائے تین چالان کاٹ رہی ہے۔
سندھ بھر میں آج سے نافذ ہونے والے لاک ڈاؤن کی پابندیوں میں ڈبل سواری کی پابندی بھی شامل ہے جس کی خلاف ورزی موٹر سائیکل سواروں کو بہت مہنگی پڑ رہی ہے۔
کراچی میں ٹریفک پولیس اہلکار قانون شکنی کرنے والے شہریوں کیخلاف بھرہور ایکشن میں نظر آرہے ہیں، ٹریفک پولیس نے فی موٹرسائیکل تین تین چالان کاٹنا شروع کردیے جس کے باعث شہری دہری اذیت میں مبتلاہوگئے۔
ایم اے جناح روڈ پر موٹرسائیکل سواروں کی شامت آگئی، ٹریفک پولیس ذرائع کے مطابق موٹر سائیکل سواروں کا پہلا چالان ڈبل سواری، دوسرا ہیلمٹ نہ پہننے اور تیسرا ماسک نہ لگانے پر کیا گیا ہے۔
ٹریفک پولیس اہلکاروں نے متعدد افراد کے چالان کاٹ دیے، ان کا کہنا ہے کہ سخت پابندی کے باوجود موٹرسائیکل سوار ڈبل سواری پر سفر کررہے ہیں۔
اس کے علاوہ شہریوں کی بڑی تعداد نے چہرے پر ماسک بھی نہیں لگایا اور نہ ہی ہیلمٹ پہن رکھا تھا، ایک ٹریفک اہلکار نے بتایا کہ ایک رکشے سے 12 افراد کو بھی اتار کر رکشے کا چالان بھی کیا گیا ہے۔
