ماسکو: روس کی وزارت خارجہ کے ترجمان کا کہنا ہے کہ ٹرمپ اپنے میزائلوں کا رخ شام کی طرف کرنے کے بجائے دہشت گردوں کی جانب کریں۔
ان خیالات کا اظہار انہوں نے امریکی صدر کی ٹویٹس کا ردعمل دیتے ہوئے کیا، روسی وزارت خارجہ کا کہنا ہے کہ کیا میزائل حملوں کی جلد کارروائی کا مقصد یہ ہے کہ بین الاقوامی تحقیق کاروں کے لیے کوئی جواب باقی نہ رہے؟
ماریا زاخاروف نے کہا کہ کیا کیمیائی ہتھیاروں کی پابندی کی تنظیم کے معائنہ کاروں نے یہ بول دیا ہے کہ اسمارٹ میزائل اب زمین پر کیمیائی ہتھیاروں کے استعمال کے تمام تر ثبوت مٹا دیں گے۔
روس کے ترجمان کا کہنا ہے کہ شام میں کسی بھی قسم کا اقدام خطے کو عدم استحکام سے دوچار کرسکتا ہے، ہم امید کرتے ہیں کہ تمام فریق بلا جواز اقدامات سے اجتناب برتیں گے جس سے خطے کی کمزور صورتحال مزید غیر مستحکم ہوجائے۔
دوسری جانب شامی حکومت نے بھی ٹرمپ کے ٹویٹس کا جواب دیتے ہوئے کہا ہے کہ ہم امریکا کی جانب سے اس طرح کے غیر ذمہ دارانہ بیان سے حیران نہیں ہوتے، امریکا شام کو نشانے بنانے کے لیے جھوٹ اور من گھرٹ باتوں کا سہارا لے رہا ہے۔
مزید پڑھیں: امریکا اور روس تنازع: شام پر مزید قہر برسنے کا اندیشہ
واضح رہے کہ امریکی صدر ڈونلڈ ٹرمپ نے روس کو دھمکی دیتے ہوئے کہا تھا کہ کیمیائی حملوں کے ردعمل میں پہلے سے زیادہ بہتر نتائج دینے والے امریکی میزائل شام کو نشانے بنانے آرہے ہیں لہٰذا روس اپنے بچاؤ کی تیاری کرلے۔
