ٹیکساس : محض دو سال کا بچہ اپنے گھر والوں کی زندگی بچانے کا ذریعہ بن گیا، اس کے والدین اور بہن بھائی خوفناک آگ میں زندہ جل کر مرنے سے بچ گئے۔
ہوا کچھ یوں کہ امریکی ریاست ٹیکساس میں رات کے اندھیرے میں ایک مکان جلنے کا اندوہناک واقعہ پیش آیا خوفناک آتشزدگی کے نتیجے میں مکان مکمل طور پر جل کر راکھ کا ڈھیر بن گیا۔
غیر ملکی خبر رساں ادارے کی رپورٹ کے مطابق اس واقعے میں گھر کا سارا سامان جل کر خاکستر ہوگیا لیکن خوش قسمتی سے اہل خانہ محفوظ رہے، والدین کے کپڑے عقب سے جل گئے اور کچھ بچوں کو خراشیں آئیں۔
بچے کی والدہ نے میڈیا کو بتایا کہ بیڈ روم میں سب بے خبر سو رہے تھے اور آگ پورے گھر کو اپنی لپیٹ میں لے چکی تھی، ہم لوگ حال ہی میں کورونا سے صحت یاب ہوئے ہیں لیکن سونگھنے اور چکھنے کی حس کام نہیں کر رہی ہے۔
والدہ کا مزید کہنا تھا کہ آگ بڑھتی گئی اور ہمیں احساس تک نہ ہوا، اسی دوران میرا دو سالہ بیٹا برینڈن کمرے میں آیا اور میرا پاؤں ہلا کر زور زور سے کہنے لگا ” ہاٹ ، ہاٹ” جس پر میری آنکھ کھلی تو دیکھا کہ کمرے کے باہر آگ کے شعلے تھے۔
جس کے بعد فوری طور پر سب کو اٹھایا اور اپنی جان بچائی ورنہ ہمیں بچنے کا موقع بھی نہ ملتا۔ اہل خانہ نے زندہ بچ جانے پر جشن منانے کا فیصلہ کیا ہے۔
یوں ایک ننھے بچے نے گھر کے7 افراد کی جانوں کو بچالیا، سوشل میڈیا پر دو سالہ برینڈن کو ہیرو قرار دیا جا رہا ہے اور صارفین اس بچے کو خواج تحسین پیش کررہے ہیں۔
