لاہور: پاکستان کرکٹ بورڈ نے عمر اکمل کو کلب کرکٹ کھیلنے کی اجازت دے دی۔
تفصیلات کے مطابق پی سی بی نے ری ہیب پروگرام کے تحت وکٹ کیپر بیٹسمین عمر اکمل کو کلب کرکٹ کھیلنے کی اجازت دے دی۔
پی سی بی کا کہنا ہے کہ عمر اکمل کا ری ہیب پروگرام گزشتہ ماہ شروع ہوا تھا، جو اگلے ماہ مکمل ہو جائے گا، کھلاڑی کو کلب کرکٹ کی اجازت ری ہیب پروگرام ہی کی ایک کڑی ہے۔
پی سی بی کے مطابق ری ہیب مکمل ہونے پر عمر اکمل اس سال ڈومیسٹک کرکٹ کھیلنے کے اہل ہوں گے۔
کرکٹ بورڈ کا کہنا ہے کہ عمر اکمل نے اظہار ندامت کے علاوہ اینٹی کرپشن لیکچر میں بھی شرکت کی، اور سیکیورٹی اینڈ اینٹی کرپشن ڈیپارٹمنٹ کے سوالات کے جوابات بھی دیے ہیں۔
پی سی بی نے کہا ہے کہ عمر اکمل کا ری ہیب پروگرام آئندہ ماہ مکمل ہو جائے گا، اس پروگرام کے بعد عمر اکمل رواں برس ہی ڈومیسٹک کرکٹ کھیلنے کے اہل ہوں گے۔
یاد رہے کہ میچ فکسنگ کی پیش کش کو رپورٹ نہ کرنے پر پی سی بی کے اینٹی کرپشن یونٹ نے عمر اکمل کے خلاف کارروائی کی تھی، عمر اکمل کو 3 سال کی پابندی کی سزا سنائی گئی تاہم انڈیپنڈنٹ ایڈجیوڈکیٹر نے اسے 18 ماہ کر دیا، بعد میں کھیلوں کی عالمی ثالثی عدالت نے ان کی اپیل پر اس میں مزید 6 ماہ کی کمی کی۔
