نیویارک : اقوام متحدہ کی انسانی حقوق کونسل میں قرآن پاک کی بے حرمتی کیخلاف پاکستان کی قرارداد منظور کرلی گئی۔
تفصیلات کے مطابق اقوامِ متحدہ کی انسانی حقوق کونسل میں قرآن پاک کی بے حرمتی کیخلاف قرارداد منظور کرلی گئی۔
پاکستان کی جانب سے پیش کی گئی قرارداد میں قرآن پاک کی بے حرمتی سمیت مذہبی منافرت کی مذمت کی گئی۔
قرارداد میں ریاستوں پرمذہبی منافرت کی روک تھام کیلئےقوانین بنانے پر زوردیتے ہوئے کہا گیا کہ آزادی رائے کا مطلب نفرت، تشدد اور امتیازی سلوک پھیلانا نہیں۔
قرارداد میں کہنا تھا کہ ایسے واقعات لوگوں کو بھڑکانے اور نفرت پھیلانے کے مترادف ہیں۔۔ تمام مذاہب کے لوگوں کو ایک دوسرے کے عقائد کا احترام کرنا چاہیے۔
قرارداد میں مطالبہ کیا گیا کہ قرآن پاک کی بےحرمتی میں ملوث عناصر کوانصاف کے کٹہرے میں لایاجائے اور ملوث عناصر کیخلاف فوری کارروائی کی جائے۔
انسانی حقوق کونسل کے اٹھائیس ارکان نے پاکستان کی قرارداد کی حمایت کی جبکہ امریکا اور یورپی یونین سمیت بارہ ارکان نے مخالفت میں ووٹ دیا جبکہ سات ارکان نے ووٹنگ میں حصہ نہیں لیا۔
مخالفت کرنے والے ارکان کہنا تھا کہ قرارداد انسانی حقوق اور آزادی اظہار کے بارے میں ان کے نقطہ نظر سے متصادم ہے۔
واضع رہے اٹھائیس جون کو سویڈن کے دارالحکومت کی مرکزی مسجد کے باہر قرآن پاک کو نذر آتش کیا گیا تھا، جس پر پوری مسلم دنیا سراپا احتجاج ہے اور تمام ممالک کی حکومتوں نے اس سلسلے میں سویڈن کی حکومت سے عملی اقدامات کا مطالبہ کیا ہے۔
