نیویارک : اقوام متحدہ کے ہیڈکوارٹرز میں پہلا کرونا وائرس کا کیس سامنے آگیا ، کرونافلپائن کےاقوام متحدہ میں نمائندے میں پایا گیا۔
تفصیلات کے مطابق نیویارک میں اقوام متحدہ کے ہیڈ کوارٹرز میں پہلے کرونا وائرس کیس کی تصدیق ہوگئی، کرونافلپائن کے اقوام متحدہ میں نمائندے میں پایا گیا، متاثرہ سفارتکار کا اقوام متحدہ کے کسی دوسرے اہلکار سے رابطہ نہیں ہوا۔
یاد رہے کرونا وائرس کے باعث دنیا کے مختلف ملکوں میں ہلاکتوں کی تعداد چار ہزار نو سو ترانوے ہوگئی جبکہ متاثرین کی تعداد ایک لاکھ چونتیس سات سو سے بڑھ گئی ہے۔
کروناوائرس نے یورپ میں پنجے گاڑ رکھے ہیں، اٹلی میں وائرس کے باعث اموات کی تعدادایک ہزارسولہ ہوگئی جبکہ 15 ہزار سے زائد بیمار ہیں، اسپین میں چھیاسی اورامریکا میں اکتالیس افراد ہلاک ہوگئے ہیں۔
مزیدپڑھیں : کرونا وائرس: دنیا بھر میں ہلاکتوں کی تعداد 4983 ہوگئی
کرونا کے باعث ایران میں اموات کا سلسلہ نہ تھم سکا،ایران میں اب تک وائرس کے شکار 439 جان سے ہاتھ دھو بیٹھے ہیں جبکہ سعودی عرب میں کرونا کے سترہ نئے کیس سامنے آنے کے بعد متاثرین کی تعداد 62 ہوگئی ہے۔
کینیڈا کے وزیراعظم کی اہلیہ میں بھی کرونا وائرس کی تصدیق ہوگئی، جس کے بعد وزیراعظم ٹروڈو نے خود کو الگ تھلگ کرلیا جبکہ صدر ٹرمپ نےرواں سال ٹوکیو اولمپکس ملتوی کرنے کا مشورہ دے دیا ہے۔
اسی طرح نیپال نے بھی ماؤنٹ ایورسٹ سر کرنے کیلئے آنے والے کوہ پیماؤں پر پابندی لگادی اور یونان میں اسکولز، سینما گھر،جم بند کردئیےگئے جبکہ چین میں کرونا وائرس کا زورٹوٹناشروع ہوگیا اور نئے کورونا وائرس کیسزکی تعداد میں کمی دیکھی جارہی ہے۔
