واشنگٹن: امریکی نائب وزیر دفاع رینڈل شریور نے کہا ہے کہ پاکستان نے دہشت گردی کے خلاف جنگ میں قابل قدر کردار ادا کیا۔
تفصیلات کے مطابق واشنگٹن ڈی سی میں پاکستانی سفارتخانے میں یوم دفاع و شہداء کی تقریب منعقد ہوئی۔ اس موقع پر اظہار خیال کرتے ہوئے امریکی نائب وزیر دفاع رینڈل شریور نے کہا کہ پاکستان اور امریکی افواج کے مابین بہترین تعلقات کار ہیں۔
ان کا کہنا تھا کہ پاکستان نے دہشت گردی کے خلاف جنگ میں قابل قدر کردار ادا کیا، علاقے میں امن کے لیے پاکستان کی قیادت کے کردار کو سراہتے ہیں۔
پاکستانی سفیر اسد مجید خان نے کہا کہ ملک کے دفاع کیلئے جانیں دینے والوں کو خراج تحسین پیش کرتے ہیں، پاکستان نے بیرونی جارحیت کے علاوہ دہشت گردی کے عفریت کو شکست دی۔
بھارت کی ہر جارحیت کا منہ توڑ جواب دیا جائے گا: وزیر اعظم
ان کا کہنا تھا کہ ہم علاقائی اور عالمی سطح پر امن و سلامتی ،آزادی اور انسانیت کے احترام کا عزم رکھتے ہیں۔ اسدمجید خان نے کہا کہ تیرہ ملین کشمیری گھروں میں محصور ہیں اور باقی دنیا سے کٹ کر رہ گئے ہیں۔
پاکستانی سفیر کا مزید کہنا تھا کہ افواج پاکستان ملک کی سلامتی کو درپیش کسی بھی خطرے سے نمٹنے کیلئے تیار ہیں، بھارت کی کنٹرول لائن پر بلا اشتعال فائرنگ کے جواب میں ذمہ داری کا مظاہرہ کر رہے ہیں۔
