واشنگٹن: امریکی نیشنل سکیورٹی کونسل کے ترجمان جان کربی کا کہنا ہے پاکستان امریکا کا دیرینہ شراکت دار ہے اور رہے گا۔ انہوں نے کہا کہ پاکستان کو سرحد پار سے تاحال دہشتگردی کے خطرات کا سامنا ہے۔
میڈیا بریفنگ کے دوران ترجمان امریکی نیشنل سکیورٹی کونسل جان کربی کا کہنا تھا کہ جو ہتھیار طالبان کے ہاتھ لگے وہ امریکا کے نہیں افغان نیشنل آرمی کے ہیں، کانگریس کی منظوری سے افغان آرمی کی ہتھیاروں سے مدد کی۔
ترجمان امریکی نیشنل سکیورٹی کونسل نے مزید کہا کہ طالبان کے قبضے کے بعد یہ ہتھیار ان کے ہاتھ لگ گئے، جبکہ کچھ افغان نیشنل آرمی حکام نے طالبان سے لڑائی نہ کرنے کا فیصلہ کیا اور ہتھیار ڈال دیئے۔
دوسری جانب گزشتہ روز پریس بریفنگ کے دوران ترجمان امریکی محکمہ خارجہ میتھیو ملر کا کہنا تھا کہ پاکستان میں آزادانہ، منصفانہ انتخابات کی حمایت جاری رکھیں گے۔
ترجمان امریکی محکمہ خارجہ میتھیو ملر نے کہا کہ ہم تمام سیاسی رہنماؤں کے ساتھ بات کرتے ہیں جو پاکستانی عوام منتخب کرتے ہیں، ہم پاکستانی سیاسی جماعتوں سے متعلق کوئی پوزیشن نہیں لیتے۔
اُن کا کہنا تھا کہ پاکستان میں آزادانہ، منصفانہ انتخابات کی حمایت جاری رکھی جائے گی، جبکہ اس حوالے سے دو طرفہ بات چیت جاری رہتی ہے۔
سلامتی کونسل: غزہ سے متعلق قرارداد پر ووٹنگ موخر کردی گئی
ترجمان امریکی محکمہ خارجہ کا کہنا ہے کہ پاکستان کے ساتھ علاقائی سلامتی، دفاعی تعاون پر شراکت کے منتظر ہیں، پاکستان امریکا کا ایک بڑا نان نیٹو اتحادی اور نیٹو پارٹنر ہے۔